នៅថ្ងៃទី ២៨ ខែឧសភា ឆ្នាំ ២០២៥ ក្រុមការងារព័ត៌មានប្រតិកម្ម នៃស្នងការដ្ឋាននគរបាលរាជធានីភ្នំពេញ បានបំភ្លឺករណីវ៉ាលិលចំនួន ២ ដែលត្រូវបានជនមិនស្គាល់អត្តសញ្ញាណ យកបោះចោលនៅក្រោមស្ពានតាអេវ ស្ថិតក្នុងខណ្ឌច្បារអំពៅ រាជធានីភ្នំពេញ។
ក្រុមការងារព័ត៌មានប្រតិកម្ម នៃស្នងការដ្ឋាននគរបាលរាជធានីភ្នំពេញ បានបញ្ជាក់ឱ្យដឹងថា នៅរសៀលថ្ងៃទី ២៨ ខែឧសភា ឆ្នាំ ២០២៥ ប្រជាពលរដ្ឋបានប្រទះឃើញវ៉ាលិសចំនួន ២ ត្រូវបានជនមិនស្គាល់អត្តសញ្ញាណយកបោះចោលនៅក្រោមស្ពានតាអេវ ស្ថិតក្នុងភូមិកោះក្របី ១ សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ បង្កឱ្យមានការភ្ញាក់ផ្អើល ហើយមានការផ្សព្វផ្សាយថាក្នុងវ៉ាលិសនោះមានក្លិនស្អុយ។
ក្រោយទទួលបាមព័ត៌មាននេះភ្លាម សមត្ថកិច្ចក៏បានចុះទៅត្រួតពិនិត្យជាក់ស្តែងនៅទីតាំងខាងលើ ហើយបានពិនិត្យវ៉ាលិសទាំង ២ នោះ ដោយឃើញថាវ៉ាលិសទាំងនោះជាវ៉ាលិសទទេតែប៉ុណ្ណោះ គ្មានអ្វីនៅក្នុងនោះទេ ដូចនេះសូមឱ្យសាធារណជនជ្រាបជាព័ត៌មាន ដើម្បីជៀសវាងកុំឱ្យមានការភាន់ច្រឡំ៕
