ផ្អឹបសមត្ថភាពអស់ ២ ឆ្នាំ ហង្ស ម៉ានីតា បង្ហាញសកម្មភាពមួយពីវិស័យបវរកញ្ញា ធ្វើឱ្យអ្នកគាំទ្រនាំគ្នាជំរុញជាថ្មី

និយាយពីបវរកញ្ញា ហង្ស ម៉ានីតា Miss Universe Cambodia 2022 អាចចាត់ទុកជាបវរកញ្ញាចក្រវាលមួយជំនាន់មានសក្កានុពលខ្លាំងក្នុងចិត្តមហាជនអ្នកគាំទ្រវិស័យបវរកញ្ញា ដែលស្រឡាញ់ចូលចិត្តជាមួយសមត្ថភាព ទេពកោសល្យ រូបសម្រស់ និង ចំណេះដឹងដ៏លេចធ្លោរបស់នាង។

គិតមកដល់ពេលនេះ រំលង ២ ជំនាន់ហើយ ក្នុងនាមជាបវរកញ្ញាចក្រវាលកម្ពុជាម្នាក់ ដ្បិតតែបវរកញ្ញារូបនេះ ស្ងប់ស្ងាត់មិនសូវឃើញមានសកម្មភាពច្រើនលើបណ្ដាញសង្គមដូចបវរកញ្ញាដទៃ ប៉ុន្តែ ហង្ស ម៉ានីតា បញ្ចេញរូបភាព ក៏ដូចជាសកម្មភាពម្ដងៗ ឃើញថាទទួលបានការចាប់អារម្មណ៍ចែករំលែកខ្លាំងពីមហាជន។

ជាក់ស្ដែង ក្រោយពីស្ងប់ស្ងាត់ពីវិស័យបវរកញ្ញាមួយរយៈធំ ថ្មីៗនេះ ក៏បានឃើញកញ្ញា ហង្ស ម៉ានីតា បង្ហាញសកម្មភាពមួយដែលបានចែករំលែករូបភាព និង វីដេអូផ្សេងៗទាក់ទងនឹងវិស័យបវរកញ្ញា ធ្វើឱ្យមហាជនអ្នកគាំទ្រជាច្រើនបានចូលបញ្ចេញមតិចង់ឱ្យនាងវិលត្រឡប់មកកាន់វិស័យបវរកញ្ញាវិញ ដែលចង់ឱ្យនាងប្រកួតកម្មវិធីបវរកញ្ញាណាមួយម្ដងទៀត ព្រោះស្ដាយសមត្ថភាព និង ចង់ឃើញនាងឈរលើឆាកអន្តរជាតិលើកមុខមាត់ប្រទេសជាថ្មី៕