កាលពីថ្ងៃទី ២៣ ខែមេសា ឆ្នាំ ២០២៥ កន្លងទៅនេះ សណ្ឋាគារដ៏ប្រណីតល្បីមួយប្រចាំខេត្តឈៀងម៉ៃ ប្រទេសថៃ មានតម្លៃជាង ៤០០០ លានបាត ប្រមាណនឹង ១០០ លានដុល្លារ មានឈ្មោះ តារាទេវី ត្រូវអគ្គិភ័យឆាបឆេះបង្កជាការខូចខាត។
តាមព័ត៌មានបានឱ្យដឹងថា អគ្គិភ័យចាប់ផ្តើមឆាបឆេះនៅម៉ោងប្រហែលជា ២ អាធ្រាត្រឈានចូលថ្ងៃទី ២៣ ខែមេសា ឆ្នាំ ២០២៥ កន្លងទៅ ដោយភ្លើងបានឆេះនៅកន្លែងផ្តល់សេវាកម្មស្ប៉ាប្រចាំសណ្ឋាគារ ដែលកន្លែងនេះត្រូវបានគេបិទចោលលែងដំណើរការទៅហើយ។ ក្នុងនោះ អាជ្ញាធរបានប្រើរយៈពេល ២ ម៉ោងក្នុងការអន្តរាគមន៍ពន្លត់បានសម្រេច តែចុងក្រោយកន្លែងខាងលើនេះ ក៏ត្រូវខូចខាតទាំងស្រុងតែម្តង។
យ៉ាងណាមិញ តាមព័ត៌មានបានឱ្យដឹងថា សណ្ឋាគារមួយនេះត្រូវបានគេប្តឹងកាលពីអំឡុងការកើតកូវីដកន្លងទៅ ហើយក៏ត្រូវបានបិទចោលមួយរយៈ និង ទើបតែបានប្តូរម្ចាស់ ហើយបានបើកឱ្យដំណើរការឡើងវិញនូវសេវាកម្មមួយចំនួនកាលពីខែមីនា ឆ្នាំ ២០២៥ កន្លងទៅ ប៉ុន្តែនៅមិនទាន់បើកឱ្យមានការស្នាក់នៅនោះទេ។
គួរឱ្យដឹងដែរថា សណ្ឋានគារ តារាទេវី ដ៏ល្បីនៅឈៀងម៉ៃមួយនេះ គឺជាទីតាំងពេញនិយមមួយដែលផលិតករភាពយន្តថៃតែងជ្រើសរើសសម្រាប់ថតរឿងជាច្រើន ទាំងសម័យ និង បុរាណ ក្នុងនោះរឿងដ៏ល្បីមួយគឺរឿង «ភ្លើងព្រះនាង» ដែលសម្តែងដោយតារាស្រី Aum Patcharapa និង តារាស្រី Yui Chiranan ក៏ធ្លាប់ថតនៅទីតាំងនោះផងដែរ៕
ប្រភព៖ Thairath
