និយាយពីតារាច្រៀងស្រីចាស់វស្សាអ្នកនាង យក់ ថិតរដ្ឋា មួយរយៈក្រោយនេះ កាន់តែវាយលុកវិស័យចម្រៀងពេញទំហឹងវិញ ឆក់បានប្រជាប្រិយភាពជាថ្មីមិនចាញ់ពីមុនឡើយ។
ពេលនេះដែរ អ្នកនាង យក់ ថិតរដ្ឋា ក៏កំពុងក្ដោបបានទីផ្សារកាន់តែខ្លាំង ដោយអ្នកនាងតែងឃើញបង្ហាញវត្តមានលើឆាកប្រគំតន្រ្តីតូចធំជាច្រើនតាមបណ្ដាខេត្ត និង ត្រូវបានអញ្ជើញច្រៀងតាមឆាកតន្រ្តី Pub, club ផ្សេងៗបន្តបន្ទាប់។
បើចាប់អារម្មណ៍លើរូបសម្រស់របស់តារាចម្រៀងស្រីរូបនេះវិញ ដ្បិតតែមានវ័យកាន់តែជ្រេ កូនៗធំទន្ទឹមខ្លួនមែន តែអ្នកនាង យក់ ថិតរដ្ឋា នៅតែក្មេងស្អាត ជាពិសេសមួយរយៈក្រោយ អ្នកនាងកាន់តែថែសម្រស់កែកុនបន្ថែមបន្តិច ព្រមទាំងថែរាងសម្រកគីឡូកាន់តែស្អាតប្លែកមួយកម្រិតទៀត។
ជាក់ស្ដែង ថ្មីៗនេះ មហាជនអ្នកគាំទ្រលើហ្វេសប៊ុកកាន់តែផ្ទុះចាប់អារម្មណ៍សរសេរពីសម្រស់របស់តារាចម្រៀង យក់ ថិតរដ្ឋា ខណៈបានឃើញអ្នកនាងបង្ហោះរូបភាពប៉ុន្មានសន្លឹកក្នុងស្ទីលលេងខ្លួនថ្មី ដែលតុបតែងស្លៀកឈុតបែបយុវវ័យ រំលេចសម្រស់របស់អ្នកនាងកាន់តែខ្ញង់ស្អាតខ្លាំងជាងកាលវ័យក្រមុំទៀតផង៕
