ថ្មីៗនេះ មហាជននិយមតាមដានបណ្តាញសង្គមនានា ច្បាស់ជាបានឃើញមកហើយនូវវីដេអូបែបកំប្លែងៗ បែបល្ខោនយីកេ និង តួត្លុករបស់យុវជន រិទ្ធ ដារ៉ូ ដែលជានិស្សិតកំពុងបន្តការសិក្សានៅឯសាកលវិទ្យាល័យភូមិន្ទវិចិត្រសិល្បៈ ជំនាញដឹកនាំរឿង ផ្នែករបាំប្រពៃណី។
ក្នុងនោះ យុវជន រិទ្ធ ដារ៉ូ ត្រូវបានគេចាប់ផ្តើមស្គាល់បន្ទាប់ពីលោកបានបង្ហោះវីដេអូបែបកំប្លុកកំប្លែងនៅលើ Tik Tok និង បានចូលរួមប្រកួតកម្មវិធី MetFone Star ដោយទទួលបានចំណាត់ថ្នាក់លេខ ៣ និង ពេលនេះក៏កំពុងបន្តដំណើរប្រកួតក្នុងរដូវកាលថ្មីផងដែរ។
ម្យ៉ាងវិញទៀត អ្វីដែលកាន់តែចាប់អារម្មណ៍ រិទ្ធ ដារ៉ូ ក៏បានសម្តែងរួមគ្នាជាដៃគូនឹងយុវជន មុំវណ្ណ ដាវីន កាន់តែស៊ីចង្វាក់គ្នា និង ផ្ទុះការគាំទ្រយ៉ាងខ្លាំង រហូតអ្នកទាំង ២ មានឱកាសបានចូលរួមសម្តែងខ្សែភាពយន្តរបស់ផលិតកម្មសាស្ត្រា «តួត្លុក» ថែមទៀតផង។
គួរជម្រាបថា យុវជន រិទ្ធ ដារ៉ូ គឺជាអតីតសិស្សសាលាមធ្យមវិចិត្រសិល្បៈ ហើយបច្ចុប្បន្នលោកជានិស្សិតកំពុងបន្តការសិក្សានៅឯសាកលវិទ្យាល័យភូមិវិចិត្រសិល្បៈ។ ក្នុងនោះ ដារ៉ូ មិនត្រឹមតែជាសិល្បៈបែបប្រពៃណីនោះទេ លោកក៏ជាពិធីករ និង ជាយុវជនស្ម័គ្រចិត្តជួយការងារសង្គមជាច្រើនផងដែរ៕
