មកដល់ពេលនេះ កម្មវិធីប្រកួតថ្វីដៃធ្វើម្ហូបលំដាប់ពិភពលោក MasterChef Cambodia រដូវកាលទី ៤ បានចាប់ផ្ដើមចាក់ផ្សាយដំណើរការប្រកួតហើយ ដែលឃើញមានការប្រកួតប្រជែងសម្រិតសម្រាំងបេក្ខជនបេក្ខនារីជាបន្តបន្ទាប់ ដែលសុទ្ធសឹងតែមានថ្វីដៃចម្អិន និង គំនិតច្នៃប្រឌិតពូកែៗលើវិស័យម្ហូបអាហារ។
បន្ទាប់ពីកម្មវិធីចាក់ផ្សាយប៉ុន្មានសប្ដាហ៍កន្លងទៅនេះ ឃើញថាបណ្ដាទស្សនិកជន និង អ្នកគាំទ្រជាច្រើន កំពុងចាប់អារម្មណ៍តាមដានមើលលើបេក្ខភាពឆ្នើមៗពូកែៗទុកជាបេក្ខភាពក្នុងចិត្តផងដែរ។ លើសពីនេះ ក្រៅពីចាប់អារម្មណ៍លើសមត្ថភាពនៃការចម្អិនម្ហូប មហាជនក៏ផ្ទុះការចែករំលែកលើបេក្ខភាពដែលមានទាំងស្នាដៃ និង រូបសម្រស់ស្រស់ស្អាតទាក់ទាញមិនធម្មតាដែរ។
ក្នុងនោះ បើក្រឡេកមើលលើបណ្ដាញសង្គមមហាជនភាគច្រើន បានផ្ទុះចែករំលែកនូវរូបភាព ក៏ដូចជាសកម្មភាពរបស់បេក្ខនារី ២ រូប ដែលមានឈ្មោះថាកញ្ញា លាវ លាងហាក់ អាយុ ២៧ ឆ្នាំ មកពីខេត្តកំពង់ចាម និង កញ្ញា វន្នី ម៉ៃឡាង អាយុ ១៩ ឆ្នាំ មកពីខេត្តកណ្ដាល ដោយមិនត្រឹមមានសមត្ថភាពពូកែចម្អិននោះទេ អ្នកទាំងពីរក៏ទទួលបានការសរសើរខ្លាំងលើរូបសម្រស់ខាងក្រៅ ទាំងរូបរាង មុខមាត់ ស្រស់ស្អាតមានមន្តស្នេហ៍មិនធម្មតា៕
