មហាជនអ្នកគាំទ្រលើបណ្ដាញសង្គមដែលធ្លាប់តាមដានកម្មវិធី MasterChef Cambodia កាលពីរដូវកាលទី ៣ ថ្មីៗនេះ កំពុងផ្ទុះចាប់អារម្មណ៍ចែករំលែកខ្លាំង ខណៈបានឃើញផ្ទុះការវែកញែកយ៉ាងក្ដៅគគុកពីអតីតបេក្ខភាពកម្មវិធី MasterChef Cambodia រដូវកាលទី ៣ នេះ ពាក់ព័ន្ធរឿងរ៉ាវអត្តចរិតផ្សេងៗ។
ក្នុងការបង្ហោះវែកញែកទាំងនោះ ក៏បានឃើញលោក វីល្លៀម ដែលជាអតីតបេក្ខភាព MasterChef Cambodia រដូវកាលទី ៣ ឆ្នើមមួយរូប បានបង្ហោះសារលើហ្វេសប៊ុកលើកឡើងយ៉ាងក្ដៅគគុក ក្នុងបំណងឆ្លើយតបទៅកាន់អតីតបេក្ខភាពរួមជំនាន់ណាម្នាក់ ទាក់ទងនឹងអត្តចរិត ក៏ដូចជារឿងរ៉ាវតាំងអំឡុងពេលប្រកួត និង ក្រោយបញ្ចប់ការប្រកួតផងដែរ។
សារនោះលោក វីល្លៀម បានបង្ហោះសារលើហ្វេសប៊ុកបន្តបន្តាប់ថា ៖ «ខ្ញុំកើតមកក្រ ហើយកំព្រាទៀត តែខ្ញុំខំរៀនខ្លួនឯងតាំងពីបឋមរហូតដល់ចប់មហាវិទ្យាល័យឱសថសាស្រ្តដោយខ្លួនឯង ខំធ្វើការផងរៀនផងតែឆ្ងល់អ្នកខ្លះដៀលខ្ញុំក្រ ខ្លួនឯងមាន តែអត់បានចូលលាសារៀន ហ្នឹងម៉េចវិញទៅ?? និយាយពីថាចង់ធ្វើឆ្កែឆ្កួតមែន ខាំគេមិនលែង ទាំងដែលខ្ញុំមិនចង់ឃើញមុខ ឬឮឈ្មោះវាសូម្បីតែបន្តិច??? មានហ្វេនគេដៀលខ្ញុំថាខំធ្វើខ្លួនឱ្យគេចូលចិត្តទៅក្រែងគេហៅថតបានលុយសងអង្គការ ខ្ញុំឮហើយភើយ ហើយគេមើលងាយខ្ញុំច្រើនណាស់ តែមិនអីទេខ្ញុំក្រមែន ខ្ញុំរាប់តែអ្នកក្របានហើយ មិនចង់រាប់អ្នកមានបែបអសីលធម៌ទេ សង្គមគេខ្ពើម បានល្បីដោយសារដៀលគេកប់មាត់ចឹង ខ្ញុំសុខចិត្តអត់ល្បី នៅធ្វើមនុស្សធម្មតាបានហើយ។ បងប្អូនខ្ញុំក្រទ្រព្យមែន ប៉ុន្តែគំនិត និង ឧត្តមគតិខ្ញុំអត់ក្រទេ»។
លើសពីនេះ លោក បានបន្តទៀតថា ៖ «មនុស្សមួយចំនួន ពូកែសម្ដី សម្ដែងយកល្បី អ្នកខ្លះក៏តែស្ករៗ…. មនុស្សគេរៀនសូត្រគេមិនធ្វើចឹងទេ មនុស្សខ្ញុំកូនខ្មែរ ទោះខ្ញុំមិនមានទ្រព្យសម្បត្តិ តែខ្ញុំមានសមត្ថភាពចិញ្ចឹមខ្លួនឯងដោយសុចរិត មិនចេះអួតអាង ដូចមនុស្សមួយចំនួន ខ្លួនមួយក្បាលពីរ ចឹងបានថា ដៀលគេឆ្កែតែអត់មើលសន្តានខ្លួន ការពិតជាឆ្កែសោះដើរតែខាំគេ ហើយមនុស្សមួយចំនួនមើលតែមួយជ្រុងថាឱ្យខ្ញុំចេះ ថាចុះ មានដឹងរឿងអត់ ការពិតទៅអ្នកក្នុង Team Work Masterchef គេដឹងពីសន្តានវាហើយ រហូតដល់គេលែងនិយាយហើយវានៅអត់ដឹងខ្លួនទៀត ហ៊ឹមអនិច្ចាមិនគួរណាមកជួបមនុស្សប្រភេទនេះសោះ»៕
