រយៈពេលប៉ុន្មានថ្ងៃមកនេះ ខ្សែភាពយន្តភាគទូរទស្សន៍រឿង «កូនប្រសាស្រី» ដែលបានចាក់បញ្ចាំងកាលពីអំឡុងឆ្នាំ ២០០៦ កន្លងទៅ កំពុងផ្ទុះគាំទ្រ និង ទស្សនាជាថ្មី ក្រោយពីអ្នកនិពន្ធអ្នកស្រី ពាន់ ភួងបុប្ឋា បានបង្ហោះសាច់រឿងជាថ្មីនៅលើ Channel Youtube របស់អ្នកស្រី។
ក្នុងនោះ ខ្សែភាពយន្តភាគខាងលើ ត្រូវបានអ្នកទស្សនាជំនាន់មុន និង ជំនាន់ក្រោយផ្ទុះការវែកញែកពីសាច់រឿងជាហូរហែ ដោយលើកឡើងពីជីវិតដ៏កម្សត់របស់តួឯកស្រី នាង សុភា ដែលសម្តែងដោយតារាស្រី នី មុល្លីកា។
យ៉ាងណាមិញ ស្របពេលខ្សែភាពយន្តភាគទូរទស្សន៍រឿង «កូនប្រសាស្រី» ត្រូវបានផ្ទុះការចែករំលែកជាថ្មី ក្នុងនោះ បទចម្រៀងក្នុងរឿងនេះ ដែលមានចំណងជើង «កូនប្រសាស្រី» ក៏មានអ្នកស្តាប់ជាថ្មីដូចគ្នាដែរ ដោយបទចម្រៀងនេះ គឺជាការបកស្រាយដោយ អ្នកនាង សុខ ស្រីនាង។
ក្រោយស្តាប់ចម្រៀងនេះហើយ អ្នកគាំទ្រជាច្រើន ក៏បានបង្ហាញអារម្មណ៍នឹករឭកដល់តារាចម្រៀង សុខ ស្រីនាង ដោយបច្ចុប្បន្នអ្នកនាង បានបាត់មុខឈឹងលើវិថីសិល្បៈ ក្រោយពីបានបញ្ចប់អាជីពនេះអស់រយៈពេលជាង ១ ឆ្នាំ ហើយមក។ លើសពីនោះ ក្រឡេកទៅមើលគណនី និង ផេកហ្វេសប៊ុករបស់អ្នកនាងក៏មិនសូវបានបង្ហាញពីសកម្មភាពរស់នៅប្រចាំថ្ងៃដែរ ដែលជាហេតុកាន់តែធ្វើឱ្យអ្នកគាំទ្រចង់ដឹងពីសុខទុក្ខរបស់អ្នកនាងយ៉ាងខ្លាំង៕
