ថ្មីៗនេះ លើបណ្ដាញសង្គមមហាជនអ្នកលេងហ្វេសប៊ុក ក៏ដូចជាអ្នកក្នុងសិល្បៈជាច្រើន បានផ្ទុះចែករំលែក និង បង្ហោះបញ្ចេញមតិវែកញែកខ្លាំងបន្តបន្ទាប់ ជុំវិញរឿងហៅពាក្យថា «ម៉ែៗ»។
ជុំវិញរឿងរ៉ាវហៅម៉ែនេះដែរ ផ្ដើមផ្ទុះវែកញែកឡើង ក្រោយពីបានឃើញវីដេអូមួយរបស់សម្ដែងស្រីជើងចាស់អ្នកនាង ច័ន្ទ តារាទី និយាយក្នុងកិច្ចសម្ភាសថាមិនចូលចិត្តឱ្យសិល្បករជំនាន់ក្រោយ ឬក្មេងៗសម័យបច្ចុប្បន្នហៅអ្នកនាងថាម៉ែៗ ឬអ្នកគ្រូ។
ស្របពេលផ្ទុះការវែកញែកនេះដែរ ក្រឡេកមើលអ្នកក្នុងសិល្បៈ ទាំងអ្នកសិល្បៈរៀមច្បង និង អ្នកសិល្បៈជំនាន់ក្រោយ បានបង្ហោះចែករំលែកលើហ្វេសប៊ុកលើកឡើងពីមតិយោបល់រៀងៗខ្លួន ដោយអ្នកខ្លះគាំទ្រការលើកឡើងរបស់អ្នកនាង ច័ន្ទ តារាទី និង អ្នកខ្លះទៀត ក៏បានបញ្ចេញមតិមិនសូវយល់ស្រប ព្រោះមនុស្សមានផ្នត់គំនិតផ្សេងៗគ្នាផងដែរ។
យ៉ាងណាមិញ បើងាកទៅមើលហ្វេសប៊ុករបស់តារាស្រីរៀមច្បងអ្នកនាង ខាត់ សុឃីម វិញ ក៏បានឃើញអ្នកនាងបង្ហោះសារបញ្ចេញមតិជុំវិញរឿងហៅម៉ែនេះដែរ ដោយអ្នកនាងបានឆ្លើយតបទៅកាន់សំណួរបស់ប្អូនៗដែលធ្លាប់ហៅអ្នកនាងថា ម៉ែឃីម ឬហៅបែបណាពីមុន គឺឱ្យហៅដូចធម្មតាបាន ព្រោះអ្នកនាងមិនប្រកាន់នោះទេ។
ការបង្ហោះនោះ អ្នកនាង ខាត់ សុឃីម បានរៀបរាប់ថា ៖ «ឆ្លើយសំណួរ កូនៗ ដែលធ្លាប់ហៅ (ម៉ែឃីម) ពីមុនហៅបង ហៅចែ ហៅមីង ហៅអ៊ំ ហៅយាយ ហៅម៉ែ (ធ្លាប់ហៅអីហៅធម្មតាទៅ) ខាត់សុឃីម មិនប្រកាន់ទេ Love you all»៕
