ផ្ទុះប្រតិកម្មខ្លាំង ក្រោយឃើញវីដេអូតារាភាពយន្តជើងចាស់ សុខ ស្រីមុំ ថ្លើមធំ ហ៊ានប្រើសម្ដីប្រមាថដល់អង្គព្រះមហាក្សត្រ និង ហ្លួងម៉ែ

ថ្មីៗនេះ អ្នកលេងបណ្តាញសង្គមហ្វេសប៊ុក និង Tik Tok កំពុងផ្ទុះការភ្ញាក់ផ្អើល និង ចែករំលែកនូវវីដេអូមួយរបស់អតីតតារាភាពយន្តជើងចាស់ អ្នកស្រី សុខ ស្រីមុំ ដោយបានប្រើពាក្យធ្ងន់ៗប្រមាថដល់អង្គព្រះមហាក្សត្រខ្មែរ និង សម្ដេចព្រះមហាក្សត្រីយានី ជាទីសក្ការៈដ៏ខ្ពង់ខ្ពស់នៃប្រជានុរាស្ត្រខ្មែរ។

ក្នុងវីដេអូនោះ អ្នកនាង សុខ ស្រីមុំ បានប្រើពាក្យមិនគម្បីក្នុងន័យប្រមាថយ៉ាងធ្ងន់ធ្ងរដល់ អង្គព្រះមហាក្សត្រ និង សម្ដេចព្រះមហាក្សត្រីយានី ថាមិនបានយាងទៅសួរសុខទុក្ខប្រជានុរាស្ត្រនៅជំរុំភៀសសឹក និង កងកម្លាំងទាហានកំពុងឈរជើងការពារបន្ទាត់ព្រំដែន។

ពាក្យសម្តីខាងលើនោះដែរ បានធ្វើឱ្យប្រជានុរាស្ត្រខ្មែរមិនអាចទទួលយកបាន ដោយមានអ្នកចូលបញ្ចេញមតិប្រតិកម្មជាបន្តបន្ទាប់ និង បានលើកឡើងថា អ្នកនាង សុខ ស្រីមុំ ទៅក្រៅប្រទេសយូរភ្លេចកំណើត និង ខ្លះទៀតលើកឡើងថា តារាភាពយន្តរូបនេះមិនបានដឹងព័ត៌មានក្នុងស្រុកអីបន្តិចសោះឡើយ ទើបថ្លើមធំហ៊ានប្រមាថដល់អង្គព្រះមហាក្សត្រ និង សម្ដេចហ្លួងម៉ែ។

ក្រោយបង្ហោះវីដេអូមិនបានប៉ុន្មាន គេសង្កេតឃើញថា អ្នកនាង សុខ ស្រីមុំ បានលុបវីដេអូនោះចោលវិញ តែទោះជាយ៉ាងនេះក្ដី វីដេអូនោះត្រូវបានសាយភាយជាបន្តបន្ទាប់ទៅហើយ ពេញក្នុងបណ្តាញសង្គម Tik Tok និង ហ្វេសប៊ុក ជាមួយនឹងការបញ្ចេញមតិប្រតិកម្មរិះគន់យ៉ាងខ្លាំងពីសំណាក់មហាជនដល់តារាភាយន្តជើងចាស់ សុខ ស្រីមុំ៕

យើងខ្ញុំសុំអធ្យាស្រ័យក្នុងការបង្ហាញវីដេអូ ដោយសារក្នុងខ្លឹមសារវីដេអូ អ្នកនាង សុខ ស្រីមុំ បានប្រើពាក្យមិនសមរម្យប្រមាថចំពោះអង្គព្រះមហាក្សត្រខ្មែរ និង សម្តេចហ្លួងម៉ែ៕