នៅរសៀលថ្ងៃទី ១៥ ខែកក្កដា ឆ្នាំ ២០២៥ កន្លងទៅ វេលាម៉ោង ១៣:២០ នាទី មានករណីមួយដោយសារតែអាកប្បកិរិយាមិនសមរម្យរបស់ទាហានថៃដែលឈរជើងនៅច្រកទ្វារចូលប្រាសាទតាមាន់ធំ បានបណ្ដាលឱ្យស្ត្រីជាជនជាតិខ្មែរមិនសប្បាយចិត្ត រហូតនាំទៅដល់ការភាន់ច្រឡំ និង ការប៉ះទង្គិចពាក្យសម្តី ហើយទាហានថៃនោះក៏បានហាមឃាត់មិនឱ្យស្ត្រីជាជនជាតិខ្មែរឡើងទៅប្រាសាទផងដែរ។
បច្ចុប្បន្ន រឿងរ៉ាវនេះត្រូវបានសម្របសម្រួលរួចហើយ តែមហាជនអ្នកប្រើប្រាស់បណ្ដាញសង្គម នៅតែផ្ទុះការចាប់អារម្មណ៍ និង សម្ដែងក្ដីស្ងើចសរសើរនូវវីរភាពរបស់ស្ត្រីកម្ពុជារូបនេះ ដែលក្លាហានឈរប្រឈមមុខជាមួយទាហានថៃ ព្រមទាំងបញ្ចេញសម្រែកចំពោះមុខទាហានថៃថា «ប្រាសាទនេះជារបស់ខ្មែរ»។ ក្រៅពីសម្រែកដ៏អង់អាច មហាជនក៏គោរពសរសើរនូវវីរភាពរបស់ស្ត្រីរូបនេះ ដែលគាត់ជាស្ត្រី ប៉ុន្តែគាត់មានទឹកចិត្តអង់អាចក្លាហាន ឈរឈ្លោះតទល់ជាមួយក្រុមទាហានថៃ ដោយភាពជាក់លាក់ស្វែងរកខុសត្រូវ ខុសពីករណីកន្លងទៅដែលមានបុរសជនជាតិថៃមកលួចវាយទាហានខ្មែរបង្ករឿង ហើយបែរលួចរត់គេចខ្លួនបាត់ គួរឱ្យអាម៉ាស់បំផុត។
យ៉ាងណាមិញ ទាក់ទិនទៅនឹងរឿងរ៉ាវថ្ងៃទី ១៥ ខែកក្កដា ឆ្នាំ ២០២៥ កន្លងផុតទៅ លោកជំទាវ ឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និង ជាអ្នកនាំពាក្យក្រសួងការពារជាតិ ក៏បានអំពាវនាវដល់ភ្ញៀវទេសចរទាំងអស់ ដែលទៅទស្សនាប្រាសាទ រក្សានូវភាពអត់ធ្មត់ ការអត់ឱន សេចក្តីថ្លៃថ្នូរ និង ការគោរពគ្នាទៅវិញទៅមក ដើម្បីធានាបរិយាកាសអំណោយផលដល់សន្តិភាព សន្តិសុខ ស្ថិរភាព និងទំ នាក់ទំនងមិត្តជិតខាងល្អ៕
