ថ្មីៗនេះ មហាជនអ្នកគាំទ្ររបស់កំពូលតារាចម្រៀងប្រុស ឧកញ៉ា ព្រាប សុវត្ថិ បានចាប់អារម្មណ៍ជ្រាបខ្លះៗរួចមកហើយ ដោយកាលពីប៉ុន្មានថ្ងៃមុន គេបានឃើញឧកញ៉ា បានបញ្ចេញ Teaser នៃស្នាដៃ MV បទចម្រៀងថ្មីមួយ ត្រៀមចេញជាផ្លូវការ ដើម្បីអបអរសាទរគម្រប់ខួប ៨ ឆ្នាំ «ចាប៉ីដងវែង» ចុះបញ្ជីបេតិកភណ្ឌវប្បធម៌អរូបីនៃមនុស្សជាតិ នៅថ្ងៃទី ៣០ ខែវិច្ឆិកា ឆ្នាំ ២០២៤ នេះ។
MV បទចម្រៀងថ្មីនេះ មានចំណងជើងថា «សែកមន្ត» ដែលជាស្នាដៃថ្មីរបស់កំពូលតារាចម្រៀងរូបនេះ និង មានការសម្ដែង MV ដោយផ្ទាល់ពីលោកឧកញ៉ា ដោយបានគ្រងឈុតសម្លៀកបំពាក់បុរាណ និង សម័យ ដែលសម្ដែងអមដោយអ្នកលេងចាប៉ីខ្មែរដងវែងជាង ១០០ ដើម ធ្វើការប្រគំបទភ្លេងបែបបុរាណលាយសម័យផងដែរ។
យ៉ាងណាមិញ MV បទចម្រៀង «សែកមន្ត» របស់កំពូលតារាចម្រៀង ឧកញ៉ា ព្រាប សុវត្ថិ គ្រាន់តែបញ្ចេញជា Teaser ប៉ុន្មានថ្ងៃនេះ ត្រូវបានមហាជនអ្នកលេងបណ្ដាញសង្គម ក៏ដូចជាអ្នកគាំទ្រជាច្រើនបានផ្ទុះការចាប់អារម្មណ៍ចែករំលែកខ្លាំងពាសពេញបណ្ដាញសង្គមភ្ជាប់ជាមួយនឹងការបញ្ចេញមតិវែកញែករៀងៗខ្លួនទៅលើបទចម្រៀងនេះ៕
