ថ្មីៗនេះ មហាជនលើបណ្តាញសង្គម កំពុងផ្ទុះការភ្ញាក់ផ្អើលខ្លាំង ដែលម៉ាកគ្រឿងអលង្ការដ៏ល្បីរបស់អ៊ីតាលី BVLGARI នឹងមករៀបចំកម្មវិធីនៅប្រាសាទបាយ័ន ទឹកដីខេត្តសៀមរាបយើង។ ដូចបានដឹងស្រាប់ ម៉ាក BVLGARI មានភាពល្បីល្បាញខ្លាំងទៅលើគ្រឿងអលង្ការ ដោយក្នុងមួយឈុតៗតម្លៃរាប់ម៉ឺន រាប់សែន រហូតដល់ខ្ទង់លានដុល្លារ។ ហើយរាល់ពេលមានកម្មវិធី តារាល្បីៗលំដាប់ពិភពលោក តែងបង្ហាញខ្លួនចូលរួម សូម្បីតារាស្រីជួរមុខកម្ពុជាយើងគឺ កញ្ញា ស៊ីន យូប៊ីន ក៏ធ្លាប់ចូលរួមផងដែរ។
បើទោះពីខាងម៉ាកយីហោ BVLGARI មិនប្រាកាសជាផ្លូវការនូវកម្មវិធីនេះក្តី ប៉ុន្តែតាមរយៈការបង្ហោះវីដេអូរបស់មហាជន ដែលថតបានផ្ទាល់នៅប្រាសាទបាយ័ន ឃើញថាម៉ាកនេះបានកំពុងរៀបចំតុបតែងយ៉ាងអស្ចារ្យ ជាពិសេស ឃើញអក្សរម៉ាកយីហោ BVLGARI ច្បាស់ៗដែលកំពុងដំឡើងនៅទីនោះផងដែរ។ អ្វីកាន់តែជាក់លាក់ទៀតនោះ ក្រុមអ្នកគាំទ្រតារាថៃ Mile បានបង្ហោះកាលវិភាគការងាររបស់លោក ដែលជាក់ស្តែងនៅលើ Poster លោកនឹងមកចូលរួមកម្មវិធី BVLGARI AETERNA ដែលនឹងធ្វើឡើងនៅថ្ងៃ សុក្រ ទី ២១ ខែ កុម្ភៈ ឆ្នាំ ២០២៥ វេលាម៉ោង ៦ ល្ងាច នៅខេត្តសៀមរាប ប្រទេសកម្ពុជា។
តាមការលម្អិតនៃការបង្ហោះនេះ កម្មវិធី BVLGARI AETERNA នឹងធ្វើឡើងជាលក្ខណៈឯកជនបំផុត មានន័យថាភ្ញៀវដែលអាចចូលរួមបាន ទាល់តែមានសំបុត្រអញ្ជើញប៉ុណ្ណោះ។ ខណៈសព្វដង កម្មវិធីនេះធ្វើឡើងមានវត្តមានសុទ្ធតែតារាល្បីៗលំដាប់ពិភពលោក មហាជនកម្ពុជាជាច្រើនក៏រំពឹងថា នឹងបានឃើញពួកគេផ្ទាល់ភ្នែកផងដែរ។ ហោចណាស់ ពួកគេក៏នឹងបានស្គាល់កម្ពុជា ហើយជាផ្នែកដ៏សំខាន់មួយទៀត ណែនាំកម្ពុជាទៅកាន់ពិភពលោក៕
