ថ្មីៗនេះ អ្នកលេងបណ្តាញសង្គមហ្វេសប៊ុក ជាពិសេស មិត្ភភក្តិ ទាំងក្នុងក្រៅសិល្បៈរបស់តារាភេទទី ៣ ផេនខេក បានផ្ទុះការចាប់អារម្មណ៍យ៉ាងខ្លាំង បន្ទាប់ពី ផេកខេក បានបង្ហាញពីបញ្ហាសុខភាពរបស់ខ្លួន។
ក្នុងនោះដែរ ផេនខេក បានធ្វើឱ្យអ្នកគាំទ្រ និង មិត្ភភក្តិ ទាំងក្នុងក្រៅសិល្បៈមានការព្រួយបារម្ភយ៉ាងខ្លាំង ខណៈពិធីការិនីភេទទី ៣ រូបនេះ បានបញ្ជាក់ថា នាងកំពុងមានបញ្ហាសុខភាព ពាក់ព័ន្ធនឹងស៊ីលីកូនដើមទ្រូងបានបែក ដែលអាចឈានដល់ការខូចក្រលៀនខ្លាំង និង មហារីកជាដើម។
តាមរយៈការរៀបរាប់របស់ ផេនខេក បានឱ្យដឹងថា៖ «រយៈពេលប៉ុន្មានឆ្នាំចុងក្រោយនេះ គិតតែពីការងារ ទោះក្តៅរងារក៏មិនហ៊ានសម្រាក ព្រោះតែកាតព្វកិច្ច ប៉ុន្តែភ្លេចថែរក្សាសុខភាពខ្លួនឯងរហូតដល់មួយរយៈចុងក្រោយនេះ ក៏ចាប់ផ្ដើមមានអាការមិនស្រួលខ្លួនពីមួយថ្ងៃទៅមួយថ្ងៃ ហើយក៏បានទៅឆែកសុខភាពមើលក៏ឃើញថា មានបញ្ហាទាក់ទងជាមួយនឹង (ស៊ីលីកូនដើមទ្រូង) មានការបែក ទន្ទឹមទាំងពេលនេះមិនទាន់បានធូរស្រាលផង មានរឿងបែបនេះកើតឡើងទៀត។
ពេលខ្លះក៏សុំទោសខ្លួនឯងដែលធ្វើការហត់នឿយរៀងជ្រុលបន្តិច ប៉ុន្តែដោយសារតែកាតព្វកិច្ច និង តួនាទីក៏មិនហ៊ានសូម្បីតែប្រើពាក្យត្អូញត្អែរ និង ចង់សម្រាក។ សម្រេចទៅ តាមដានសុខភាពបន្តក៏លោកគ្រូពេទ្យបានបញ្ជាក់ប្រាប់ថាបើបន្តទុក (ស៊ីលីកូន) នៅក្នុងខ្លួនទៀត អាចនឹងមានបញ្ហារលាកកាន់តែខ្លាំង និង ឈានដល់មហារីកជាដើម។
ជាមនុស្សម្នាក់ ដែលតែងតែផ្ដល់ស្នាមញញឹមឱ្យមនុស្សគ្រប់គ្នា ក៏មិនចង់និយាយពាក្យសម្ដី ដែលធ្វើឱ្យខ្លួនឯងទន់ជ្រាយនៅលើបណ្ដាញសង្គម។ នេះជាសាររំឭកដាស់តឿន ចង់ឱ្យបងប្អូនទាំងអស់គ្នាកុំគិតតែពីការងារ រហូតដល់ភ្លេចគិតគូរពីសុខភាព (ផ្លូវកាយ និង ផ្លូវចិត្តដូចជានាងខ្ញុំ)»៕
