ជុំវិញរឿងរ៉ាវក្ដៅគគុកលើបណ្ដាញសង្គមដែលធ្វើឱ្យមហាជន និង អ្នកសិល្បៈជាច្រើន កំពុងផ្ទុះវែកញែកខ្លាំងលើអ្នកបង្កើតមាតិកាលោក Jonh Sey បន្ទាប់ពីរូបលោកបង្ហោះសារលើកឡើងថាតារាស្រុកខ្មែរល្បីៗមួយចំនួនស្ងាត់មិនអើពើពាក់ព័ន្ធរឿងបញ្ហាប្រទេសជាតិ។
ចំពោះការលើកឡើងបែបនេះ ឃើញថាទាំងមហាជនអ្នកលេងហ្វេសប៊ុក ជាពិសេសអ្នកសិល្បៈជាច្រើនបានចាប់អារម្មណ៍ចែករំលែកខ្លាំង និង កំពុងក្លាយជាប្រធានបទមួយលើកមកបង្ហោះវែកញែកបញ្ចេញជាមតិយោបល់លើហ្វេសប៊ុករៀងៗខ្លួន។
ជាមួយគ្នានោះ ក៏បានឃើញលោក អ៊ឹម ជីវ៉ា បង្ហោះសារលើហ្វេសប៊ុកពាក់ព័ន្ធនឹងប្រធានបទខាងលើដែរ ដោយលោកបានលើករំឭកដល់រឿងរ៉ាវប្រទេសជាតិតាំងពីជំនាន់មុន ដែលអ្នកសិល្បៈបានចេញមុខនិយាយការពារប្រឆាំងជាមួយការឈ្លានពានរបស់ថៃយូរមកហើយ។ លើសពីនេះ លោកក៏បានឱ្យដឹងដែរថា ពាក្យថាតារាស្ងាត់រឿងបញ្ហាជាតិនេះ គឺមានតាំងពីជំនាន់មុនមកម៉្លេះ តែលោកចង់ឱ្យប្ដូរពាក្យវិញថា សិល្បៈគួរចេញមុខលើកទឹកចិត្តកងទ័ព និង ថ្នាក់ដឹកនាំពេលជាតិមានបញ្ហា។
ក្នុងនោះ លោក អ៊ឹម ជីវ៉ា បានបង្ហោះរៀបរាប់លើហ្វេសប៊ុកថា ៖«កុំដៀមដាមថាសិល្បៈមិនចេញមុខរឿងសៀម ចង់ប្រាប់ពួកហែងថា អញចេះធ្វើបាតុកម្មប្រឆាំងថៃ ជេរថៃ តាំងជំនាន់នាងផ្កាយព្រឹកម្ល៉េះ ប្រហែលតាំងពួកហែងមិនកើតផងមិនដឹង!», «ពាក្យថាតារាខ្លះស្ងាត់ឈឹង រឿងសៀម ពាក្យនេះមិនមែនទើបតែឥឡូវទេ គឺតាំងពីជំនាន់នាងផ្កាយព្រឹក យើងប្តូរពាក្យមកវិញថា សិល្បៈគួរចេញមុខលើកទឹកចិត្តកងទ័ព និង ថ្នាក់ដឹកនាំ ពេលប្រទេសជាតិមានបញ្ហា»៕
