ថ្មីៗនេះ មហាជនបានកំពុងផ្ទុះការមិនពេញចិត្តយ៉ាងខ្លាំង បន្ទាប់ពីបានឃើញវីដេអូប្រមូលសំរាមតាមប្រឡាយទឹកមួយ ដែលបង្ហោះដោយទំព័រហ្វេសប៊ុក និស្សិតប្លាស្ទិក ដែលមាន លោក ហែម សុភេម ជាស្ថាបនិក។
ពិតមែនទៅ ការប្រមូលសំរាមនេះ ស្ថាបនិក ហែម សុភេម និង ក្រុមយុវជននិស្សិតប្លាស្ទិករបស់លោក បានធ្វើវាច្រើនដងរាប់មិនអស់ទៅហើយ ប៉ុន្តែអ្វីដែលមហាជន តែងមានការទើសចិត្ត ដោយហេតុ អ្នកដែលនៅតំបន់ចោលសំរាមទាំងនោះ មិនទុកដាក់សំរាមឱ្យបានត្រឹមត្រូវ តែងបោះចោលពាសវាលពាសកាល ធ្វើឱ្យប៉ះពាល់ដល់បរិស្ថាន និង សណ្តាប់ធ្នាប់សាធារណៈ។
ជាក់ស្តែង តាមរយៈវីដេអូប្រមូលសំរាមតាមប្រឡាយទឹក ដែល និស្សិតប្លាស្ទិក ទើបតែបង្ហោះ មានអ្នកចូលមើលប្រមាណជាង ២ លាននាក់ ក្នុងនោះមហាជនគ្រប់គ្នាបាន Comment សរសើរយុវជន និង អរគុណចំពោះការរួមចំណែកជួយដល់បរិស្ថាន។ ហើយដោយមានការហួសចិត្តខ្លាំង ចំពោះអ្នកចោលសំរាម មហាជនក៏បានសរសេរ Comment បញ្ចេញមតិរិះគន់ហូរហែផងដែរ។
គួរឱ្យដឹងដែរថា លោក ហែម សុភេម ជាយុវជនដំបូងបង្អស់ដែលផ្តួចផ្តើមបង្កើត «និស្សិតប្លាស្ទិក» ដែលដំបូងឡើយមានតែលោកម្នាក់ប៉ុណ្ណោះ ខណៈបច្ចុប្បន្ននិស្សិតប្លាស្ទិកក្លាយជាក្រុមយុវជនដ៏ឆ្នើមមួយ ដែលឆ្លៀតពេលពីការសិក្សាប្រមូលផ្តុំគ្នាធ្វើកិច្ចការសង្គមដោយនាំគ្នីគ្នាសម្អាតសំរាមទាំងនៅលើគោក និង ប្រមូលសំរាម ឬ កាកសំណល់ប្លាស្ទិកនានានៅតាមផ្ទៃទឹក នៅតាមដងទន្លេមេគង្គ ឬ តាមប្រឡាយទឹកមួយចំនួនជាដើម៕
