ស្របពេលកម្មវិធីប្រកួត Miss Universe Cambodia 2025 បាននឹងកំពុងដំណើរការ នៃការដាក់ពាក្យប្រកួតហើយនោះ គេបានឃើញសន្ទុះអ្នកគាំទ្រកម្មវិធីខាងលើ បានចែករំលែកនូវការគាំទ្រខ្លាំង បន្ទាប់ពីមាន Idol ក្នុងចិត្តរបស់ពួកគេបានចូលរួមប្រកួត។
យ៉ាងណាមិញ ថ្មីៗនេះ អ្នកលេងបណ្តាញសង្គមហ្វេសប៊ុក ជាពិសេសអ្នកគាំទ្រ អតីតលំដាប់រងទី ១ Miss Queen Cambodia 2023 ជា ដេវីណា បានបង្ហាញការរីករាយយ៉ាងខ្លាំង បន្ទាប់ពីបវរកញ្ញាភេទទី ៣ រូបនេះ បានបង្ហាញរូបភាព នៃការដាក់ពាក្យចូលរួមប្រកួត Miss Universe Cambodia 2025។
គួររំឭកថា បវរកញ្ញាភេទទី ៣ ជា ដេវីណា ឆក់បានការគាំទ្រយ៉ាងខ្លាំង នៅពេលដែលនាងបានបោះជំហានប្រកួតលើវិស័យបវរកញ្ញាដំបូងបង្អស់នៅក្នុងកម្មវិធី Miss Queen Cambodia 2023។ កាលនោះ ដេវីណា ឆក់បានតំណេងលំដាប់រងទី ១ និង សុំលាលែងពីតំណែងវិញភ្លាមៗ ដោយនាងបានក្តោបការងារលើវិថីសិល្បៈ ក្នុងនាមជាតារាបង្ហាញម៉ូដឯករាជ្យ។
មានការលើកសរសើរថា បើទោះ ជា ដេវីណា ជាបវរកញ្ញាភេទទី ៣ ក៏ពិតមែន ប៉ុន្តែនាងមានរូបសម្រស់ស្រស់សោភា ល្អគន់ខ្លាំង និង មានចំណេះដឹងខ្ពស់ ដែលជាហេតុធ្វើឱ្យរាល់ការបោះជំហានលើឆាកប្រកួតបវរកញ្ញា អ្នកគាំទ្រតែងតែរំពឹងខ្ពស់ ថានាងអាចទទួលបានលទ្ធផលល្អ៕
