ផ្ញើពោះនៅមន្ទីរពេទ្យ ទៅតាមដានកូនក្នុងផ្ទៃរាល់ខែ ដល់ថ្ងៃឈឺពោះឆ្លងទន្លេ ពេទ្យប្រាប់ថាអត់ឃើញមានកូនក្នុងផ្ទៃ

ថ្មីៗនេះ នៅប្រទេសថៃ មានករណីហួសចិត្តមួយដោយបានកើតឡើងទៅលើស្រ្តីម្នាក់ដែលបានផ្ញើពោះនៅមន្ទីរពេទ្យមួយកន្លែង តែដល់ថ្ងៃឆ្លងទន្លេស្រាប់តែគ្រូពេទ្យប្រាប់ថាបាត់កូនពីក្នុងពោះ។

ស្រ្តីរូបនេះបានរៀបរាប់ឱ្យដឹងថា នាងចាប់ផ្តើមពពោះកាលពីខែកុម្ភៈ ឆ្នាំ ២០២៤ កន្លងទៅ ហើយនាងបានទៅផ្ញើពោះនៅគ្លីនិកមួយកន្លែង រួចក៏ប្តូរមកផ្ញើនៅមន្ទីរពេទ្យប្រចាំខេត្ត ប៉ាធុមថានី វិញ។ ក្នុងនោះ នាងបានចេញចូលមន្ទីរពេទ្យជាញឹកញាប់ ដើម្បីតាមដានសុខភាពកូននៅក្នុងផ្ទៃ ហើយឃើញថាកូនរបស់នាងពិតជាលូតលាស់បានល្អមែន។

មកដល់ខែកញ្ញា ឆ្នាំ ២០២៤ គ្រូពេទ្យបានប្រាប់ថាឃើញនាងមានថង់ទឹកភ្លោះមួយទៀត រួចក៏ណែនាំឱ្យនាងវះកាត់សម្រាលមុនខែ តែដោយមិនឃើញនាងមានអាការគួរឱ្យបារម្ភ ទើបគ្រូពេទ្យណាត់នាងមកសម្រាលនៅចុងខែវិច្ឆិកាវិញ។ លុះមកដល់ថ្ងៃកំណត់ ស្រាប់តែពេទ្យឱ្យពន្យារពេលដល់ចុងខែធ្នូទៀត ដោយអាងថានាងកំពុងតែក្អក អាចបណ្តាលឱ្យប៉ះពាល់ដល់ថ្នេរនៅពេលវះកាត់រួច។

យ៉ាងណាមិញ មកដល់ចុងខែមករា ឆ្នាំ ២០២៥ កន្លងទៅ នាងក៏នៅតែមិនទាន់បានសម្រាលកូន ហើយកូនមិនឃើញរើក្នុងពោះ ទើបនាងប្រញាប់ទៅមន្ទីរពេទ្យដដែល ស្រាប់តែគ្រូពេទ្យបានឱ្យដឹងថា គេមិនមានព័ត៌មាននៃការផ្ញើពោះរបស់នាងនោះទេ លើសពីនេះទៅទៀត នៅពេលឆ្លុះអេកូទៅក៏ឃើញថាកូនរបស់នាងមានអាយុទើបតែបាន ៣ ខែប៉ុណ្ណោះ។ ដោយឡែក ដោយសារតែការមិនអស់ចិត្ត និង ហួសចិត្តជាមួយនឹងមន្ទីរពេទ្យ ទើបពេលនេះនាងបានយករឿងរ៉ាវមកចែកចាយ ដោយសង្ឃឹមថានាងនឹងមានអាជ្ញាធរពាក់ព័ន្ធជួយដោះស្រាយឱ្យ៕

ប្រភព៖ AMARINTV