ថ្មីៗនេះ មានផេកមួយរបស់ថៃ ឈ្មោះ ลูกค้าคือบร๊ะเจ้า បានចេញមុខចោទថាកម្ពុជាបានបន្លំលួចយកឈុតបុរាណរបស់ខ្លួន ទៅដាក់ចូលបេតិកភណ្ឌពិភពលោកជាមួយនឹងពិធីរៀបអាពាហ៍ពិពាហ៍នៅឆ្នាំ ២០២៦ ខាងមុខនេះ។
ក្នុងនោះ ផេកខាងលើនេះ បានបង្ហាញការមិនសុខចិត្តថា កម្ពុជានឹងត្រៀមយកពិធីរៀបអាពាហ៍ពិពាហ៍ចូលជាសម្បត្តិបេតិកភណ្ឌពិភពលោកនៅក្នុងឆ្នាំ ២០២៦ ខាងមុននេះហើយ តែហេតុអ្វីក្នុងឯកសាររៀបចំបង្ហាញ បែរជាមានរូបភាពឈុតបុរាណថៃនៅក្នុងនោះដែរ។ ផេកនេះបានឱ្យដឹងទៀតថា ការយកឈុតថៃទៅដាក់បែបនេះ អាចធ្វើឱ្យមានការច្រឡំថាឈុតថៃជាផ្នែកមួយនៃវប្បធម៌ខ្មែរ។
ផេកដដែលនេះ បានអំពាវនាវឱ្យក្រសួងវប្បធម៌ថៃ និងភ្នាក់ងារពាក់ព័ន្ធតាមដានស្ថានការណ៍នេះឱ្យបានដិតដល់ និងរៀបចំភស្តុតាងប្រវត្តិសាស្ត្រ ក៏ដូចជាវប្បធម៌ ដើម្បីបញ្ជាក់ពីឈុតរបស់ថៃ និងប្រពៃណីរៀបការរបស់ថៃឱ្យបានច្បាស់លាស់។ លើសពីនេះ ថែមទាំងចង់ឱ្យមានសកម្មភាពការទូត ឬទាក់ទងជាមួយអង្គការយូណេស្កូ ដើម្បីការពារសិទ្ធិ និង វប្បធម៌របស់ប្រទេសខ្លួនទៀតផង៕
ប្រភព៖ ลูกค้าคือบร๊ะเจ้า
