បន្ទាប់ពីរឿងរ៉ាវផ្ទុះការវែកញែកបែកផ្សេងពីមហាជនលើបណ្ដាញសង្គម ដែលជាប្រធានបទក្ដៅគគុកពាក់ព័ន្ធរវាងរៀមច្បង និង សិស្សប្អូននោះ មកដល់ព្រឹកថ្ងៃទី ១៧ ខែកក្កដា ឆ្នាំ ២០២៥ នេះ តារាច្រៀងស្រី ពេជ្រ សូលីកា ក៏បានចេញបង្ហោះសារលើកដំបូង ដោយរៀបរាប់ក្នុងន័យមិនចង់ធ្វើការបកស្រាយវែងឆ្ងាយច្រើន ដោយបានបោះសម្ដីចុងក្រោយថាមាសសុទ្ធមិនខ្លាចភ្លើង។
យ៉ាងណាមិញ ក្រោយពីបង្ហោះសារយ៉ាងវែងនោះដែរ ក៏បានឃើញតារាចម្រៀង ពេជ្រ សូលីកា បានបង្ហោះរៀបរាប់បន្ថែមលើ Story ហ្វេសប៊ុកទៀត ដោយនាងបានបង្ហើបទាក់ទងនឹងសារសំឡេងនៃការសន្ទនាទាក់ទងនឹងរឿងរ៉ាវផ្ទុះវែកញែកនោះ ដែលមានរយៈ ១១ នាទី ដោយនាងអះអាងថាបានថតរក្សាទុក និង មិនបានកាត់ត ឬលុបចោលភាគីម្ខាងណាឡើយ។
ក្នុងនោះដែរ អ្នកនាង ពេជ្រ សូលីកា ក៏បានបញ្ជាក់ឱ្យដឹងថា ដោយសារនាងមិនចូលចិត្តការបកស្រាយតាំងពីដើមមក និង សុំបញ្ចប់រឿងរ៉ាវដោយមិនត្រូវការបកស្រាយនាំឱ្យកាន់តែវឹកវរបន្តទៀត ដោយនាងបានបោះសម្ដីបែបខ្លីៗ «ចែកកន្លែងគ្នារស់ទៅ» ទៀតផង។
សារនោះ អ្នកនាង ពេជ្រ សូលីកា បានរៀបរាប់ថា ៖ «ការសន្ទនា ពីដើមហេតុនៃសាច់រឿង មានរយៈពេលសរុបទាំងអស់ 11 នាទីជាង បន្ទាប់ពីនាងខ្ញុំ បានធ្វើការថតរក្សារទុក ដោយមិនបានកាត់ត ឬ លុបចោលភាគីម្ខាងណាឡើយ But I need peace និង មិនចូលចិត្តបកស្រាយតាំងពីដើម ខ្ញុំជាតារាចម្រៀង ត្រូវមានកេរ្តិ៍ឈ្មោះកិត្តិយសល្អ ភាពល្បីល្បាញដែលនាងខ្ញុំមាន គឺបានមកពីសម្ថភាព និង សំឡេង ដូច្នេះហើយ ខ្ញុំធ្វើតែទីផ្សារចម្រៀងតែមួយមុខគត់ ព្រោះខ្ញុំដឹងថា ការទាមទាររបស់មនុស្ស គឺ គ្មានពាក្យថាឆ្អែតនោះទ ត្រូវបកស្រាយហើយបកស្រាយទៀត បើគេចង់ស្វែងយល់ពីយើង គេនឹងយល់តាំងពីដំបូង សរុបមក អ្វីដែលខ្ញុំចង់បាន គឺនាងខ្ញុំចង់បញ្ចប់ មិនត្រូវការបកស្រាយ នាំឱ្យភាពវឹកវរបន្តទៀតទេ ព្រោះតាំងពីមានបញ្ហាមក ខ្ញុំមិនដែលគិតថាចង់ពាក់ព័ន្ធបន្តទៀតឡើយ ខ្លីៗ «ចែកកន្លែងគ្នារស់ទៅ»៕
