កាលពីយប់រំលងអធ្រាត្រវេលាម៉ោង ១២ យប់ ឈានចូលថ្ងៃទី ១៣ ខែមិថុនា ឆ្នាំ ២០២៥ នេះ ក្រសួងព័ត៌មាន បានចេញសេចក្តីជូនដំណឹងទាំងយប់ទៅកាន់បណ្តាស្ថានីយទូរទស្សន៍ទាំងអស់នៅកម្ពុជា ឱ្យបញ្ឈប់ការចាក់ផ្សាយភាពយន្តថៃគ្រប់ប្រភេទ ក្រោយពីការបង្ហោះសំណេររបស់សម្តេច ហ៊ុន សែន ក្នុងការពិចារណាការចាក់ផ្សាយខ្សែភាពយន្តថៃនៅលើកញ្ចក់ទូរទស្សន៍កម្ពុជាទាំងអស់។
ភ្លាមនោះដែរ ក្រោយពីការបង្ហោះសំណេរក្នុងការបញ្ឈប់ការចាក់ផ្សាយខ្សែភាពយន្តថៃលើកញ្ចក់ទូរទស្សន៍កម្ពុជាទាំងអស់ និង បានចេញសេចក្តីជូនដំណឹងជាផ្លូវការរបស់ក្រសួងព័ត៌មានហើយនោះ អ្នកលេងបណ្តាញសង្គមហ្វេសប៊ុក បានចាប់អារម្មណ៍នឹងការបង្ហោះសាររបស់ផលិតករភាពយន្ត និង ជាអ្នកនិពន្ធខ្មែរដ៏ល្បី គឺលោក ឆាយ បូរ៉ា ពាក់ព័ន្ធនឹងការផលិតភាពយន្តនៅកម្ពុជាផងដែរ។
ក្នុងនោះ ផលិតករភាពយន្តលោក ឆាយ បូរ៉ា បានរៀបរាប់ថា៖ «ជាដំណឹងល្អ សម្រាប់ផលិតករខ្មែរក្នុងដំណាក់កាលដំបូង។ តើយើងត្រូវធ្វើកិច្ចការអ្វីទៀត សម្រាប់ភាពយន្តខ្មែរ? នេះជាសំណួរដែលផលិតករទាំងអស់ត្រៀមគិត ត្រៀមធ្វើ។ ចំពោះប្រភេទរឿង ដែលដាក់បញ្ចាំងតាមរោងភាពយន្ត ភាគច្រើនសុទ្ឋសឹងតែប្រភេទរឿង រន្ឋត់ (ខ្មោច) ដែលទីផ្សារចំពោះរឿងប្រភេទនេះស្ទើរតែនៅទ្រឹង និង ថមថយចំនួនទស្សនិកជន ដែលជាហេតុនាំឱ្យទំហំសេដ្ឋកិច្ចភាពយន្តមានការធ្លាក់ចុះ។
តាមការសិក្សាស្រាវជ្រាវរបស់ខ្ញុំ លើប្រទេសជិតខាង មានជាអាទ៌ប្រទេសវៀតណាម ម៉ាឡេស៊ី ប្រទេសចិន។ល។ ការីកចំរើនក្នុងវិស័យភាពយន្តទៅបាន គឺអាស្រ័យប្រភេទភាពយន្តផ្សេងៗ ក្រៅពីប្រភេទរឿងខ្មោច គឺគេផ្តោត លើប្រភេទផ្សេងៗ មានដូចជា ៖ Thriller, Drama, Comedy, Romance, Action. ប្រភេទរឿង រន្ឋត់បច្ចុប្បន្នហាក់ដូចជាច្រើនលើសលប់លើសពីសេចក្តីត្រូវការ និង មានភាពច្រំដែល តែវាជាសេរីភាពរបស់ផលិតករទេ។
ការគិតផលិតប្រភេទរឿងផ្សេងៗ អាចប្រឈមហានិភ័យច្រើន ដោយប្រឈមនឹងទីផ្សារថ្មី ទស្សនិកជនថ្មី ការមិនសូវគាំទ្រពីរោងភាពយន្តលើកាលវិភាគបញ្ចាំងជាដើម។ល។ តើយើងមានយុទ្ឋសាស្ត្រអ្វី ដើម្បទ្រទ្រង់វិស័យភាពយន្តខ្មែរ? នេះជាសំណួរដដែលៗរាប់ឆ្នាំមកហើយ។ សូមគាំទ្រប្រសាសន៍របស់សម្តេច»៕
