មហាជននិយមតាមដាន អ្នកឧកញ៉ាវេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងជាអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន ច្បាស់ជាបានជ្រាបមកហើយពីជីវប្រវត្តិដ៏តស៊ូ និង ឈឺចាប់ កាលពីកុមារភាពរបស់អ្នកឧកញ៉ាវេជ្ជបណ្ឌិត ដែលបានចងក្រងក្នុងសៀវភៅ «ភ្នំដងរែក ទីពុំអាចភ្លេច»។
ក្នុងនោះ តាមរយៈសៀវភៅខាងលើ ដែលជាស្នាដៃនិពន្ធរបស់អ្នកឧកញ៉ា វេជ្ជបណ្ឌិត គួច ម៉េងលី បានរៀបរាប់ពីខ្សែជីវិតដ៏ឈឺចាប់ខ្មៅងងឹតជាលើកទី ២ របស់អ្នកឧកញ៉ា វេជ្ជបណ្ឌិត និង ក្រុមគ្រួសារ តាំងពីការរត់គេចចេញពីការធ្វើទុក្ខបុកម្នេញរបស់ពួកខ្មែរក្រហម រហូតការដឹកជញ្ជូនឆ្ពោះទៅទម្លាក់ជ្រោះភ្នំដងរែក ដែលក្រុមគ្រួសារអ្នកឧកញ៉ា ក៏ដូចជាជនភៀសខ្លួនរាប់ម៉ឺននាក់ផ្សេងទៀត ត្រូវទាហានប៉ារ៉ាថៃបង្ខំឱ្យដើរទម្លាក់ជ្រោះមរណៈដ៏សែនចោត និង មហាប្រល័យ ដែលផ្នែកខាងក្រោមនៃជ្រោះ គឺពោរពេញទៅដោយគ្រាប់មីន។
ក្នុងសៀវភៅនេះ ក៏បានរៀបរាប់ពី សភាពនៃដំណើរដើរកាត់ជ្រោះមរណៈដ៏មហាសែនប្រល័យ ទីជ្រលងជ្រោះភ្នំ ដែលសម្បូរដោយគ្រាប់មីនបង្កៃ ដំណើរឆ្លងកាត់គំនរសាកសពរដូករណែល ការបង្ខំចិត្តផឹកទឹកដងអូរ ដែលមានខ្មោចអណ្ដែតស្ពីង និង មានខ្លាញ់រលើប ការរើសចំណីពីខ្មោច សម្រែកនៃសេចក្ដីសោកសង្រេងកើតចេញពីការនិរាសព្រាត់ប្រាស់ក្រុមគ្រួសារ សាច់ញាតិ សភាពរងទុក្ខវេទនាបណ្ដាលមកពីអត់អាហារ អាកាសធាតុ និង ស្ថានភាពផ្លូវមិនអំណោយផល ការវង្វេងក្នុងព្រៃឬស្សី សភាពដេកក្នុងទឹក ការដើរសុំទានគេ បូករួមនឹងជីវិតពីកុមារភាព និង ការឆ្លងកាត់របបអាវខ្លីដោយអន្លើផងនោះនៃយុវភាពរបស់អ្នកឧកញ៉ា វេជ្ជបណ្ឌិត គួច ម៉េងលី និង ក្រុមគ្រួសារផងដែរ។
យ៉ាងណាមិញ អ្វីដែលកំពុងត្រូវបានមហាជនចាប់អារម្មណ៍នោះ នៅរសៀលថ្ងៃទី ២៦ ខែកញ្ញា ឆ្នាំ ២០២៥ នេះ តាមរយៈផេកផ្លូវការរបស់ផលិតកម្ម LD បានប្រកាសស្វែងរកតួចូលរួមសម្តែងក្នុងរឿង «សោដនាកម្មភ្នំខ្មោច» ដែលជាសាច់រឿងដកស្រង់ចេញពីខ្សែជីវិតពិតរបស់អ្នកឧកញ៉ាវេជ្ជ បណ្ឌិត គួច ម៉េងលី តែម្តង។ ក្នុងនោះដែរ ក្រោយពីបានឃើញការបង្ហោះរបស់ផលិតកម្ម LD ហើយនោះ មហាជន ក៏កំពុងអន្ទះសាចង់ទស្សនាភាពយន្តមួយនេះឆាប់ៗ៕
