នៅថ្ងៃទី ០៧ ខែតុលា ឆ្នាំ ២០២៥ មន្ទីរទេសចរណ៍ខេត្តរតនគិរី បានជូនដំណឹងឱ្យបានដឹងថា យុវជនឈ្មោះ រម៉ាស់ ឃ្វេន ដែលធ្វើដំណើរថ្មើរជើងដើម្បីផ្សព្វផ្សាយតំបន់ទេសចរណ៍ ពីរាជធានីភ្នំពេញ មកកាន់ខេត្តរតនគិរី បានមកដល់គោលដៅហើយ ដោយប្រើរយៈពេល ១២ ថ្ងៃ។
ខាងមន្ទីរទេសចរណ៍បានបន្តឱ្យដឹងថា ក្រោយធ្វើដំណើរថ្មើរជើងមកដល់គោលដៅបានដោយជោគជ័យ ដោយមានការចង្អុលបង្ហាញពី ឯកឧត្តម ញ៉ែម សំអឿន អភិបាលនៃគណៈអភិបាលខេត្ត ក្រុមការងារបានពាំនាំថវិកា ដឹកនាំដោយ ឯកឧត្តម ឌុច ចាន់តូ អភិបាលខេត្តស្តីទី និង អាជ្ញាធរខេត្ត ក្រុង ស្រុក ថ្នាក់ដឹកនាំឃុំសង្កាត់ មន្ទីរជំនាញ និង ប្រជាពលរដ្ឋ បានទទួលស្វាគមន៍ ព្រមទាំងសាទរជាមួយយុវជន រម៉ាស់ ឃ្វេន និង បាននាំយកនូវថវិកាលើកទឹកចិត្តមួយចំនួនដល់យុវជន រម៉ាស់ ឃ្វេន ដែលមានឆន្ទៈធ្វើដំណើរដោយថ្មើរជើងពីរាជធានីភ្នំពេញ មកកាន់ទឹកដីឦសានខេត្តរតនគិរី ក្នុងគោលបំណងផ្សព្វផ្សាយពីតំបន់ទេសចរណ៍ក្នុងខេត្តរតនគិរី។
តាមប្រភពបានបន្តថា ជាទិសដៅបន្ទាប់ យុវជនខាងលើ នឹងធ្វើដំណើរបន្តឆ្ពោះទៅកាន់ស្រុកអូរយ៉ាដាវ ខេត្តរតនគិរី ដែលជាស្រុកកំណើតរបស់ខ្លួន ដែលមានចំងាយជាង ៦០ គ.ម ពីក្រុងបានលុង៕
