ស្ត្រីបរទេសម្នាក់ ជាអ្នកធ្វើការនៅហាងលក់សម្លៀកបំពាក់ បានបង្ហោះវីដេអូនៅលើ TikTok និយាយថា ប្រើសិនបើអ្នកលឬពាក់ខោអាវថ្មីមិនបោកសម្អាត អ្នកអាចប្រឈមនឹងជំងឺស្បែកម្យ៉ាង កើតចេញពីមេរោគផ្សិតបង្កឱ្យរមាស់។ នាងយល់ដែលគ្រប់គ្នាចង់ពាក់របស់នៅថ្មី ប៉ុន្តែគួរគប្បីគិតថា តើនរណាខ្លះបានប៉ះពាល់វា ហើយពួកគេមានរោគអ្វីខ្លះ?។
ជាក់ស្តែង នាងត្រឹមតែជាអ្នករៀបចំខោអាវដែលគេលរួច ប៉ុន្តែនាងបានឆ្លងវា ដោយមិនដឹងខ្លួន កើតជាកន្ទួលរមាស់ឡើងក្រហម ដែលគេស្គាល់ថាជាជំងឺស្រែង។ ជាទូទៅ ជំងឺស្រែងអាចឆ្លងពីមនុស្សម្នាក់ទៅមនុស្សម្នាក់បានយ៉ាងងាយ តាមរយៈការប្រើសម្លៀកបំពាក់ និង កន្សែង ជាដើម ដែលអ្នកកើតជំងឺស្រែងបានប្រើប្រាស់វារួច។
នាងបានឆ្លងជំងឺនេះ នៅពេលនាងធ្វើការនៅបន្ទប់លសម្លៀកបំពាក់នៃហាងលក់សម្លៀកបំពាក់ដ៏ធំមួយ។ ដែលសំខាន់ នាងគ្រាន់តែប៉ះ គ្រាន់តែប្រមែប្រមូលសម្លៀកបំពាក់ដែលគេលរួច និង មិនបានពាក់វាផង នាងក៏នៅតែឆ្លងផងដែរ។ ដូចនេះនាងផ្តាំឱ្យគ្រប់គ្នាប្រុងប្រយ័ត្ន ព្រោះយើងមើលមិនឃើញ មិនដឹងថាតើនរណាមានរោគអ្វីខ្លះ ដែលអាចនាំពីស្បែករបស់ពួកគេមកតោងជាប់នឹងសម្លៀកបំពាក់ ហើយឆ្លងមកកាន់អ្នកដោយមិនដឹងខ្លួន៕
