បើលើកយកតារាចម្រៀងវ័យក្មេង តែនិយមបង្ហើរសំនៀងតាមរយៈបទចម្រៀងពីដើមៗ ដែលមានទឹកដមសំឡេងថ្នម មហាជនមួយចំនួនច្បាស់ជាបានស្គាល់លោក ជួន អមរិទ្ធ ជាក់ជាមិនខាន។
តារាចម្រៀងប្រុសរូបនេះ បានប្រឡូកក្នុងវិស័យសិល្បៈប្រមាណជិត ១០ ឆ្នាំមកហើយ ដោយលោក ជួន អមរិទ្ធ និយមការច្រៀងបទចម្រៀងមនោសញ្ចេតនា និង បទចម្រៀងមរតកដើមបានយ៉ាងពីរោះ។
ជាការពិតណាស់ ស្របពេលមមាញឹកក្នុងវិថីសិល្បៈ ដោយឡើងច្រៀងលើឆាកកម្មវិធីប្រគំតន្ត្រីចុងសប្តាហ៍របស់ទូរទស្សន៍នានាមិនដែលលស់នោះ លោក ជួន អមរិទ្ធ ក៏ជាម្ចាស់សិប្បកម្មផលិតប្រហិតក្នុងប្រទេសកម្ពុជាមួយរូបដែរ ដោយសិប្បកម្មរបស់លោកមានឈ្មោះថា «អមរិទ្ធ ប្រហិតសាច់គោគ្រួសារខ្មែរ»។ សិប្បកម្មរបស់លោកនេះដែរ បានដំណើរការអស់រយៈពេលជាច្រើនឆ្នាំមកហើយ ដែលជាផលិតផលកូនខ្មែរ ផលិតក្នុងស្រុក និង មានស្តង់ដា អនាម័យថែមទៀតផង។
គួរជម្រាបថា បច្ចុប្បន្ន តារាចម្រៀងប្រុស ជួន អមរិទ្ធ មិនត្រឹមតែមានអាជីពលើវិថីសិល្បៈជាអ្នកចម្រៀង និង ជាថៅកែសិប្បកម្មប្រហិតនោះទេ លោកក៏ជាស្ថាបនិក Film Media ផងដែរ៕
