នៅថ្ងៃទី ២៥ ខែកុម្ភៈ ឆ្នាំ ២០២៥ តាមរយៈឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានចែករំលែកចំណេះដឹងទូទៅពាក់ព័ន្ធទៅនឹងអត្តសញ្ញាណប័ណ្ណឱ្យបានដឹងថា ៖ «អត្តសញ្ញាណប័ណ្ណសញ្ជាតិខ្មែរដែលរបក បាក់ ខូច អាចដាក់ពាក្យស្នើសុំបោះពុម្ពប្តូរថ្មីបាន ដោយពុំមានគិតម្រៃសេវាទេ»។
ក្នុងនោះដែរ កាលពីពេលកន្លងទៅ ឯកឧត្តមអគ្គនាយករង នៃអគ្គនាយកដ្ឋានអត្តសញ្ញាណកម្ម ក៏ធ្លាប់បានចែករំលែកអំពីឯកសារតម្រូវមួយចំនួនផងដែរ ដែលមានទៅតាមករណីដូចខាងក្រោម ៖
១. ករណីសុំផ្តល់ថ្មី ត្រូវមានឯកសារ
– សេចក្តីចម្លងសំបុត្រកំណើត ឬសេចក្តីចម្លងសំបុត្របញ្ជាក់កំណើត ដែលចេញដោយមន្ត្រីអត្រានុកូលដ្ឋាន ឃុំ សង្កាត់ ឬ ចេញដោយសាលាក្រុង ស្រុក ខណ្ឌ ដែលបានចុះបញ្ជី ឬចេញដោយនាយកដ្ឋានអត្រានុកូលដ្ឋាន
– សៀវភៅស្នាក់នៅ ឬសៀវភៅគ្រួសារ (ច្បាប់ដើម ឬច្បាប់ចម្លងមានបញ្ជាក់ត្រឹមត្រូវតាមច្បាប់ដើម)
២. ករណីផុត ឬជិតផុតសុពលភាព ត្រូវមានឯកសារ
– អត្តសញ្ញាណប័ណ្ណសញ្ជាតិខ្មែរដែលផុតសុពលភាព ឬ មុនផុតសុពលភាពយ៉ាងច្រើន ៩០ ថ្ងៃ
– ឯកសារសំអាងផ្សេងៗ ករណីមានការកែតម្រូវទិន្នន័យក្នុងអត្តសញ្ញាណប័ណ្ណសញ្ជាតិខ្មែរ ឧទាហរណ៍ដូចជាអាសយដ្ឋានជាដើម ដែលត្រូវភ្ជាប់ជាមួយសៀវភៅស្នាក់នៅ។
៣. ករណីបាត់ ត្រូវស្នើសុំទុតិយតា និង មានឯកសារ
ពាក្យបណ្តឹងបាត់ និងពាក្យស្នើសុំទុតិយតា ពីប៉ុស្តិ៍នគរបាលរដ្ឋបាលដែលស្នាក់នៅអចិន្ត្រៃយ៍
៤.ករណីខូច ត្រូវមានអត្តសញ្ញាណប័ណ្ណសញ្ជាតិខ្មែរដែលខូច
៥.ករណីកែតម្រូវ ត្រូវមានឯកសារ
– អត្តសញ្ញាណប័ណ្ណសញ្ជាតិខ្មែរដែលខុសទិន្នន័យ
– សេចក្តីចម្លងសំបុត្រកំណើត ឬ សេចក្តីចម្លងសំបុត្របញ្ជាក់កំណើត
– សៀវភៅស្នាក់នៅ និង សៀវភៅគ្រួសារ និង ឯកសារថតចម្លងដែលមានបញ្ជាក់ត្រឹមត្រូវតាមច្បាប់ដើម
– ករណីខ្លះទាមទារឯកសារគល់បញ្ជីអត្រានុកូលដ្ឋាន
– សេចក្តីសម្រេចកែតម្រូវ ចេញដោយមន្ត្រីអត្រានុកូលដ្ឋានថ្នាក់ជាតិ
– ឬសេចក្តីសម្រេចរបស់តុលាការ ដែលមានការទទួលស្គាល់ឱ្យកែតម្រូវពីនាយកដ្ឋានអត្រានុកូលដ្ឋាន។ល។
៦.ករណីស្ទួនខ្ចៅដៃ
សូមទំនាក់ទំនងផ្ទាល់មកកាន់ការិយាល័យអត្តសញ្ញាណប័ណ្ណសញ្ជាតិខ្មែរ នៃស្នងការដ្ឋាននគរបាលរាជធានី ខេត្ត ឬមកនាយកដ្ឋានអត្តសញ្ញាណប័ណ្ណសញ្ជាតិខ្មែរ ដើម្បីដោះស្រាយ។
យ៉ាងណាមិញ ចំពោះទីតាំងផ្តល់សេវាអត្តសញ្ញាណប័ណ្ណសញ្ជាតិខ្មែរ អាចធ្វើនៅប៉ុស្តិ៍នគរបាលរដ្ឋបាលឃុំ សង្កាត់ ឬ អធិការដ្ឋាននគរបាលក្រុង ស្រុក ខណ្ឌ ឬ ស្នងការដ្ឋាននគរបាលរាជធានី ខេត្ត ឬ នៅនាយកដ្ឋានអត្តសញ្ញាណប័ណ្ណសញ្ជាតិខ្មែរ ឬ នៅសាខាអត្តសញ្ញាណប័ណ្ណផ្សារទំនើប AEON2៕
