ប្រាប់តៗផង! ចង់កែអាសយដ្ឋាន ក្នុងអត្តសញ្ញាណប័ណ្ណសញ្ជាតិខ្មែរ អាចធ្វើបាន ឱ្យតែមានលក្ខខណ្ឌ និង ឯកសារ ២ នេះ

នាពេលថ្មីៗនេះ ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានចែករំលែកចំណេះដឹងជូនទៅកាន់សាធារណជន អំពីការកែតម្រូវអាសយដ្ឋាន ក្នុងអត្តសញ្ញាណប័ណ្ណសញ្ជាតិខ្មែរ។

ជាក់ស្ដែង ឯកឧត្តម ឧត្តមសេនីយ៍ឯក បានបញ្ជាក់ឱ្យបានដឹងថា អត្តសញ្ញាណប័ណ្ណសញ្ជាតិខ្មែរ អាចប្តូរអាសយដ្ឋានបាន នៅពេលទៅថតធ្វើថ្មី ករណីផុត ឬ ជិតផុតសុពលភាពក្រោម ១៨០ ថ្ងៃ ដោយភ្ជាប់សៀវភៅស្នាក់នៅថ្មី ដែលឯកសារតម្រូវរួមមាន ៖

១. អត្តសញ្ញាណប័ណ្ណសញ្ជាតិខ្មែរ ដែលផុត ឬ ជិតផុតសុពលភាពក្រោម ១៨០ ថ្ងៃ

២. សៀវភៅស្នាក់នៅ ឬ សៀវភៅគ្រួសារ ដែលមានអាសយដ្ឋានបច្ចុប្បន្នថ្មី។

ដោយឡែក​ ចំពោះទីកន្លែងនៃការស្នើសុំផ្តល់អត្តសញ្ញាណបណ្ណសញ្ជាតិខ្មែរ ប្រជាពលរដ្ឋខ្មែរគ្រប់រូប ដែលមានអាយុចាប់ពី ១៥ ឆ្នាំឡើង រួមទាំងព្រះសង្ឃ បព្វជិតសាសនា ជនជាប់ឃុំ ឬ ជនវិបល្លាសស្មារតី អាចធ្វើការស្នើសុំផ្តល់អត្តសញ្ញាណបណ្ណសញ្ជាតិខ្មែរបាន នៅតាមទីតាំងណាមួយដូចខាងក្រោម ៖

១. ប៉ុស្តិ៍នគរបាលរដ្ឋបាលឃុំ សង្កាត់ នៃលំនៅឋានរបស់សាមីខ្លួនកំពុងរស់នៅ

២. អធិការដ្ឋាននគរបាលក្រុង ស្រុក ខណ្ឌ នៃលំនៅឋានរបស់សាមីខ្លួនកំពុងរស់នៅ

៣. ស្នងការដ្ឋាននគរបាលរាជធានី ខេត្ត នៃលំនៅឋានរបស់សាមីខ្លួនកំពុងរស់នៅ

៤. នាយកដ្ឋានអត្តសញ្ញាណបណ្ណសញ្ជាតិខ្មែរ

៥. ទីស្នាក់ការផ្តល់សេវាអត្តសញ្ញាណបណ្ណសញ្ជាតិខ្មែរ ផ្សារទំនើបអ៊ីអនម៉លសែនសុខ (អ៊ីអន២)

៦. ទីស្នាក់ការផ្តល់សេវាអត្តសញ្ញាណបណ្ណសញ្ជាតិខ្មែរ ផ្សារទំនើបអ៊ីអនម៉លមានជ័យ (អីអន៣)

៧. ទីស្នាក់ការកណ្តាលបេឡាជាតិសន្តិសុខសង្គម (ប.ស.ស.) (សម្រាប់សមាជិក ប.ស.ស.)៕