ប្រិយមិត្តអ្នកគាំទ្រវិស័យចម្រៀងខ្មែរ ប្រាកដជាបានស្គាល់ នួន សុធារ័ក្ស មិនខាន ដោយរូបគេគឺជាអតីតបេក្ខភាពដ៏ឆ្នើមមួយរូបក្នុងកម្មវិធីប្រឡងចម្រៀង Cambodian Idol រដូវកាលទី ២ កាលពីឆ្នាំ ២០១៦ តែយ៉ាងណាកាលណោះ រូបគេមិនបានទទួលជ័យជម្នះឡើយ ដោយបានត្រឹមវគ្គផ្តាច់ព្រ័ត្រ ៣ នាក់ចុងក្រោយប៉ុណ្ណោះ។
ទោះជាមិនបានឈ្នះពានរង្វាន់ក្តី ប៉ុន្តែបន្ទាប់ពីប្រឡងចប់ បេក្ខជនឆ្នើម នួន សុធារ័ក្ស ត្រូវបានគេដឹងថាក្លាយជាតារាចម្រៀងអាជីពជាប់កុងត្រាក្នុងផលិតកម្មរស្មីហង្សមាស តាំងពីពេលនោះរហូតមកទល់បច្ចុប្បន្ននេះផងដែរ។
បើគិតមកទល់បច្ចុប្បន្ន នួន សុធារ័ក្ស បានក្លាយជាតារាចម្រៀងអាជីពប្រចាំផលិតកម្មរស្មីហង្សមាស ប្រមាណជិត ១០ ឆ្នាំមកហើយ ហើយក្នុងរយៈពេលប៉ុន្មានឆ្នាំមកនេះ រូបគេក៏បានកសាងប្រជាប្រិយភាពឱ្យកាន់តែមានឈ្មោះបោះសំឡេងល្បីមិនស្ទើរដែរ។
យ៉ាងណាមិញ ស្របពេលកំពុងបំបុកខ្លួនឱ្យកាន់តែមានឈ្មោះល្បីក្នុងវិថីសិល្បៈនោះ មហាជនអ្នកគាំទ្រតារាចម្រៀងប្រុសរូបនេះ ក៏បានកត់សម្គាល់ឃើញពីភាពប្រែប្រួលរបស់រូបគេផងដែរ ដោយគេបានចាប់អារម្មណ៍ឃើញ នួន សុធារ័ក្ស ផ្លាស់ប្តូររូបរាងកាន់តែបែកសាច់ទ្រលុកទ្រលន់ជាងមុន ខុសឆ្ងាយពីពេលដែលតារាចម្រៀងរូបនេះកំពុងប្រកួតប្រជែងក្នុងកម្មវិធី Cambodian Idol។
ជាក់ស្តែង កាលពីថ្មីៗកន្លងទៅនេះ រូបភាពប៉ុន្មានសន្លឹករបស់តារាចម្រៀង នួន សុធារ័ក្ស ខណៈចូលរួមជាភ្ញៀវកិត្តិយសក្នុងពិធីមង្គលការរបស់ពិធីការិនី សុភ័ក្រ កុសុម៉ា នៅព្រឹកថ្ងៃទី ៤ ខែវិច្ឆិកា ឆ្នាំ ២០២៤ បានបង្ហាញយ៉ាងច្បាស់ថាតារាចម្រៀងរូបនេះនៅតែរក្សាគីឡូធ្ងន់ដដែល ប៉ុន្តែតាមរយៈរូបភាពដែលឃើញបង្ហោះនេះដែរ មើលទៅ នួន សុធារ័ក្ស មានភាពសមសួន និង ឃ្យូតមួយបែបទៀត។
អ្វីដែលគួរឱ្យចាប់អារម្មណ៍ជាងនេះទៀតនោះ គឺតារាចម្រៀង នួន សុធារ័ក្ស មកដល់ពេលនេះនៅតែមិនទាន់មានគូស្នេហ៍នឹងគេ ខណៈមិត្តរួមជំនាន់ម្នាក់ៗមានគូ និង ខ្លះបានរៀបការសាងគ្រួសារស្ទើរអស់ទៅហើយ។ ទោះជាមានការប្រែប្រួលរូបរាង និង នៅ Single យ៉ាងណាក្តី ប៉ុន្តែបើងាកទៅមើលសមត្ថភាពច្រៀង និង ទេពកោសល្យសិល្បៈរបស់តារាចម្រៀងរូបនេះ នៅតែខ្លាំង និង តែងទទួលបានការគាំទ្រច្រើនពីមហាជនដដែល៕
-រូបភាពពេល នួន សុធារ័ក្ស កំពុងប្រឡង
