ពិតណាស់ ស្របពេលកាន់តែទទួលបានប្រជាប្រិយភាព និង ទីផ្សារកាន់តែខ្លាំងក្នុងវិស័យសម្ដែង លោក ម៉ឺនឯក សុភារិទ្ធ ក៏បានធ្វើឱ្យមហាជន ជាពិសេសអ្នកគាំទ្ររបស់លោកហាក់ភ្ញាក់ផ្អើល និង មានការរំភើបចិត្តខ្លាំង ក្រោយឃើញលោកសម្រេចចិត្តប្រឡូកចូលក្នុងវិស័យបុរសឯក ដែលបានឃើញបង្ហាញវត្តមានជាបេក្ខភាពចូលរួមប្រកួតក្នុងកម្មវិធី Mister Supranational Cambodia ឆ្នាំ ២០២៥។
ចំពោះការចូលប្រឡូកក្នុងវិស័យបុរសឯកនេះដែរ តារាសម្ដែងប្រុសរូបនេះ ពិតជាទទួលបានការគាំទ្រយ៉ាងពេញទំហឹងពីមហាជន ក៏ដូចមិត្តអ្នកសិល្បៈជាច្រើន ដោយមើលឃើញពីរូបសម្បត្តិ សមត្ថភាពទេពកោសល្យរបស់លោក និង រំពឹងថាលោកនឹងអាចជោគជ័យលើវិស័យនេះថែមទៀតផង។
យ៉ាងណាមិញ ក្នុងដំណើរការប្រកួតកម្មវិធី Mister Supranational Cambodia 2025 កន្លងទៅនេះ លោក ម៉ឺនឯក សុភារិទ្ធ ក៏តែងឆក់បានការចាប់អារម្មណ៍សរសើរពីមហាជន ជាមួយភាពលេចធ្លោរបស់លោកពីមួយវគ្គទៅមួយ។
ដោយឡែក មកដល់វគ្គប្រកួតផ្ដាច់ព្រ័ត្រកាលពីថ្មីៗកន្លងទៅនេះ ដែលកម្មវិធី Mister Supranational Cambodia 2025 បានប្រកាសរកឃើញម្ចាស់ជ័យលាភីបុរសឯកថ្មីប្រចាំឆ្នាំ បានទៅលើលោក ហ៊ាប ស៊ាងហ៊ុយ ខណៈតារាសម្ដែងប្រុសរូបនេះ ក៏ទទួលបានលទ្ធផលល្អជាទីគាប់ចិត្តដែរ គឺលោកទទួលបានជ័យលាភីតំណែងរងទី ១ នៃ Mister Supranational Cambodia 2025 ៕
