ប្រឡងជាប់នាំគ្នាទៅលាមាត់-ក នៅព្រះអង្គដងកើ ទំនងដាក់បច្ច័យមិនត្រូវចិត្ត ស្រាប់តែមានអាចារ្យម្នាក់ប្រើពាក្យសម្ដីធ្វើឱ្យខកចិត្តខ្លាំង

មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការភ្ញាក់ផ្អើល និង ចែករំលែកបន្តគ្នាព្រោងព្រាត បន្ទាប់ពីមានយុវតីមួយរូប បានបង្ហោះសារបង្ហាញពីអារម្មណ៍ខកចិត្តរបស់ខ្លួន នៅពេលយកផ្លែឈើទៅសែនជាមួយមិត្តភក្តិនៅមុខព្រះអង្គដងកើ បានជួបអាចារ្យ ដែលដាក់បច្ច័យមិនត្រូវចិត្ត បានសម្លក់មើលមុខពួកគេ និង ក្រោយពេលសុំលាភត្រឡប់មកផ្ទះវិញ បានលាន់មាត់បញ្ចេញពាក្យថា «ចឹងចេះប្រឡងជាប់ដែរ»។

ទាក់ទិនទៅនឹងរឿងនេះ តាមរយៈគណនីរបស់យុវតីដែលមានឈ្មោះ Na Liss បានបង្ហោះរូបភាពភ្ជាប់ជាមួយសារ នៅថ្ងៃទី ២៩ ខែកញ្ញា ឆ្នាំ ២០២៥ ឱ្យបានដឹងដូចតទៅ ៖ «នៅកន្លែងទីសក្ការៈបូជាមួយនៅខាងមុខវាំង ប៉ុន្តែបែរជាជួបពាក្យនិយាយមិនត្រូវនឹងមនុស្សមានធម៌ក្នុងខ្លួនទាល់តែសោះ។ គ្នាខ្ញុំមកសែនក្រោយប្រឡងបាក់ឌុបជាប់ ពួកខ្ញុំក៏យកផ្លែឈើមកសែន ប៉ុន្តែពេលដាក់សែនអាចារ្យបានឱ្យដាក់បច្ច័យ ប៉ុន្តែចំនួនមិនត្រូវចិត្ត គាត់សម្លក់មើលមុខពួកខ្ញុំ ពេលចេញមកវិញ ពួកខ្ញុំក៏សុំលាភ តែបែរជាគាត់លាន់មាត់បញ្ចេញពាក្យថា «ចឹងចេះប្រឡងជាប់ដែរ» ទាំងការដាក់សម្ដីដៀមដាម។ តើទង្វើបែបនេះសមជាអ្នករៀនធម៌ទេ? ទីតាំងដ៏ល្បីស័ក្កិសិទ្ធិនៅមុខវាំងទៀត ប៉ុន្តែជួបហើយលែងចង់មកទៀត»។

ក្រោយបង្ហោះបែបនេះ ក៏មានអ្នកប្រើប្រាស់បណ្ដាញសង្គមមួយចំនួន បានផ្ទុះការប្រតិកម្មបង្ហាញអារម្មណ៍មិនពេញចិត្តចំពោះសកម្មភាពនេះឡើយ និង បានចែករំលែកបន្តគ្នាព្រោងព្រាតនៅលើបណ្ដាញសង្គម៕