Gilead Sciences ជាក្រុមហ៊ុនផលិតឱសថមួយដ៏ល្បីនៅសហរដ្ឋអាមេរិក បានប្រកាសឱ្យដឹងថា ខ្លួនបានព្រមព្រៀងជាមួយនឹងរោងចក្រចំនួន ៦ ក្នុងការផលិតថ្នាំចាក់ Lenacapavir ដែលជាថ្នាំសម្រាប់ការពារ និង ព្យាបាលជំងឺអេដស៍ នៅក្នុងតម្លៃថោកជាងធម្មតា សម្រាប់លក់ឱ្យប្រទេសដែលមានចំណូលទាប និង មធ្យមចំនួន ១២០ ប្រទេសជុំវិញពិភពលោក។
តាមព័ត៌មានបានឱ្យដឹងថា Lenacapavir ជាថ្នាំចាក់ការពារ និង ព្យាបាលជំងឺអេដស៍ ដែលត្រូវចាក់ ២ ដងក្នុងមួយឆ្នាំ ហើយមានតម្លៃប្រហែល ៤២២៥០ ដុល្លារឯណោះក្នុងមួយឆ្នាំ សម្រាប់ប្រទេសដែលមានចំណូលខ្ពស់ដូចជាសហរដ្ឋអាមេរិក។ យ៉ាងណាមិញ ខាង Gilead Sciences បានផ្តល់សិទ្ធិឱ្យទៅរោងចក្រក្រុមហ៊ុនចំនួន ៦ ដើម្បីឱ្យផលិតថ្នាំនេះនៅក្នុងតម្លៃទាប ដើម្បីឱ្យប្រទេសចំនួន ១២០ ទៀតដែលមានចំណូលទាប និង មធ្យម អាចប្រើប្រាស់បាន។ ក្នុងនោះដែរ ខាង UNAids និង អ្នកតស៊ូមតិជាច្រើនកំពុងតែជំរុញឱ្យមានការកំណត់តម្លៃត្រឹម ៤០ ដុល្លារប៉ុណ្ណោះក្នុងមួយឆ្នាំ។
យ៉ាងណាមិញ ទន្ទឹមនឹងនេះ ការប្រកាសនេះកំពុងតែរងការរិះគន់ ដោយមានអ្នកយល់ថា Gilead Sciences មិនបានរាប់បញ្ជូលប្រទេសចំណូលមធ្យមកម្រិតខ្ពស់មួយចំនួន ដែលមានហានិភ័យឆ្លងជំងឺអេដស៍កំពុងតែកើនឡើង ជាពិសេសគឺនៅតំបន់អាមេរិកឡាទីន៕
ប្រភព៖ Theguardian
