ប្រវត្តិ អ្នកឧកញ៉ា ហេង ឡុង វិនិយោគិនខ្មែរដ៏លេចធ្លោ ជាម្ចាស់ក្រុមហ៊ុនធំៗ ៥ ក្នុងវិស័យកសិកម្មនៅកម្ពុជា

បើតាមគេហទំព័រ សមាគមឧកញ៉ាកម្ពុជា អ្នកឧកញ៉ា ហេង ឡុង ត្រូវបានគេស្គាល់ជាវិយោគិនខ្មែរដ៏ល្បីល្បាញ និង លេចធ្លោមួយរូបនៅក្នុងវិស័យកសិកម្មនៅកម្ពុជា។ អ្នកឧកញ៉ាកើតក្នុងឆ្នាំ ១៩៥៥ នៅខេត្តព្រៃវែង និង បានចូលប្រឡូកក្នុងវិស័យជំនួញអស់រយៈកាលជាច្រើនទសវត្សរ៍មកហើយ។

ក្រៅពីមានតួនាទីជាអនុប្រធានសមាគមឧកញ៉ាកម្ពុជា  អ្នកឧកញ៉ាជាម្ចាស់ក្រុមហ៊ុនធំៗមួយចំនួនដូចជា៖

១. ក្រុមហ៊ុន ឡុង ស្រេង អ៊ិនធើណេសិនណល (Long Sreng International Co. Ltd)  ដែលបានវិនិយោគលើចម្ការកៅស៊ូលើផ្ទៃដីចំនួនជាង ៧.០០០ ហិកតា និង ចម្ការចេកលើផ្ទៃដីចំនួន ១.៥០០ ហិចតា ហើយក៏ជាក្រុមហ៊ុនកៅស៊ូក្រែបឈានមុខគេនៅក្នុងប្រទេសកម្ពុជា។

២. ក្រុមហ៊ុន បឹងកេត ផ្លេនធីង និង អ៊ិនដាសស្ទ្រៀល (Boeung Ket Plating & Industrial Co., Ltd.) ដែលវិនិយោគលើដំណាំស្វាយស្រស់សម្រាប់បម្រើការនាំចេញ។

៣. ក្រុមហ៊ុន ឡុង ស្រេង ហ័រជាន អាហ្គ្រីខលឈ័រ ឌីវេឡុបមិន (Long Sreng Hua Jian Agriculture Development Co., Ltd.) ដែលមានជំនាញក្នុងការដាំចេក និង​ មានចម្ការចេកអំបូងលឿងលើផ្ទៃដីចំនួន ៧០០ ហិកតាសម្រាប់បម្រើការនាំចេញ។

៤. ក្រុមហ៊ុន បឹងកេត ភែកខេជីង ហ្វេកធើរី (Boeung Ket Packaging Factory Co., Ltd.) ដែលផលិតកេសក្រដាស និង ថង់ផ្លាស្ទិកគ្រប់ប្រភេទ។

៥. ក្រុមហ៊ុនរោងចក្រផលិតជីសរីរាង្គបឹងកេត។

ក្រៅពីការកិច្ចការជំនួញ និង វិនិយោគ ដែលជាផ្នែកមួយក្នុងការលើកស្ទួយវិស័យកសិកម្មក៏ដូចជាសេដ្ឋកិច្ចកម្ពុជា និង បង្កើតការងារដល់ប្រជាជនជាច្រើនពាន់នាក់ អ្នកឧកញ៉ាក៏បានបរិច្ចាគទ្រព្យធនជាច្រើនព្រមទាំងកម្លាំងកាយ ចិត្ត ប្រាជ្ញាស្មារតី និង ពេលវេលាក្នុងការចូលរួមយ៉ាងសកម្មនៅក្នុងសកម្មភាពសង្គម និង សកម្មភាពមនុស្សធម៌។

អ្នកឧកញ៉ា ហេង ឡុង ត្រូវបានទទួលស្គាល់ពីរាជរដ្ឋាភិបាលកម្ពុជា តាមរយៈការផ្តល់ជូននូវគ្រឿងឥស្សរិយយសជាច្រើន ជាពិសេសគ្រឿងឥស្សរិយយសថ្នាក់កំពូល «ជាតូបការ» ដែលប្រោសព្រះរាជទានដោយព្រះមហាក្សត្រ នៃព្រះរាជាណាចក្រកម្ពុជាផងដែរ៕