ឯកឧត្តម ឡុង គឹម ឃន ត្រូវបានគេស្គាល់ថា ជាសហគ្រិន និង ជាមន្ត្រីមួយរូបនៅក្នុងជួររដ្ឋាភិបាល។ ឯកឧត្តមជាស្ថាបនិក ក្រុមហ៊ុន AI Farm Robotics Factory ជាកន្លែងប្រមូលផ្ដុំនូវវិស្វកករបច្ចេកវិទ្យាខ្មែរឆ្នើមផ្នែក AI រ៉ូបូត និង ស្វ័យប្រវត្ដិកម្ម ដែលធ្វើការការស្រាវជ្រាវផលិតផលិតផលបច្ចេកវិទ្យា AI ស្វ័យប្រវត្តិកម្ម ដែលជារបស់ខ្មែរ ដើម្បីរួមចំណែកអភិវឌ្ឍន៍ប្រទេសកម្ពុជាឱ្យកាន់តែទំនើបជាងមុន។
មុនក្លាយជាស្ថាបនិកក្រុមហ៊ុនដ៏ធំដូចសព្វថ្ងៃ មែនទែនទៅ ឯកឧត្តម ឡុង គឹម ឃន គឺជាអ្នកតស៊ូរៀនសូត្រ ដែលប្រសូតចេញពីគ្រួសារកសិករ។ ចាប់កំណើតនៅខេត្តកំពង់ឆ្នាំង មានបងប្អូន ៧ នាក់ កាលវ័យកុមារភាព ឯកឧត្តមតែងចំណាយពេលនៅវាលស្រែ បរទេះគោនៅពេលថ្ងៃរះ និង នេសាទត្រីជាមួយឪពុកនៅលើដងទន្លេសាប។
ចូលមកដល់អាយុ ១៧ ឆ្នាំ ឯកឧត្តមបានផ្លាស់មកទីក្រុងភ្នំពេញ ដើម្បីបន្តការសិក្សា។ ជីវិតនៅទីក្រុង មិនស្រួលដូចនៅស្រុកស្រែឡើយ ស្នាក់នៅក្នុងវត្ត រស់នៅក្នុងបន្ទប់តូចដំបូលបែកបាក់។ ពេលយប់ធ្វើការជាសន្តិសុខ ដល់ព្រឹកឡើងត្រូវជិះកង់ចម្ងាយ ១០-២០ គីឡូម៉ែត្រ ដើម្បីបានសិក្សាភាសាអង់គ្លេស។ ការស្រេកឃ្លានចំណេះដឹង បានធ្វើឱ្យឯកឧត្តម បានសិក្សាភាសាជាច្រើនទៀតរួមមាន ចិន បារាំង ជប៉ុន និង កូរ៉េជាដើម។ ឯកឧត្តមបានព្យាយាមរៀនសូត្រ រហូតទទួលបានអាហារូបករណ៍ សិក្សាផ្នែកទស្សនវិជ្ជានៅសាកលវិទ្យាល័យភូមិន្ទភ្នំពេញ។ បន្ទាប់មកបន្តថ្នាក់អនុបណ្ឌិតចំនួនពីរ និង កម្មវិធីសិក្សា PhD programme នៅប្រទេសថៃ។
ទន្ទឹមទទួលបានចំណេះដឹងកម្រិតខ្ពស់ ឯកឧត្តមក៏មានទំនោរទៅលើអ្វីដែលកាន់តែធំជាងនេះ នោះគឺការបញ្ចូលគ្នានូវ បច្ចេកវិទ្យា សហគ្រិន និង ការអភិវឌ្ឍន៍ជាតិ។ ឯកឧត្តមមានចំណូលចិត្តលើរ៉ូបូត និង បច្ចេកវិទ្យាបញ្ញាសិប្បនិម្មិត AI ក្រោយពេលបានជួបនិស្សិត ដែលសិក្សាខាងរ៉ូបូត និង ស្វ័យប្រវត្តិកម្ម។
ដោយឃើញការគាំទ្រផ្នែកឧស្សាហកម្មរ៉ូបូតនៅកម្ពុជាមានតិចតួច ឯកឧត្តមបានសម្រេចចិត្តកសាងវាឡើងដោយខ្លួនឯង។ ឯកឧត្តមបានបង្កើត AI Farm ជាស្ទូឌីយ៉ូ startup ដែលអាចពង្រីកខ្លួនទៅក្នុងក្រុមហ៊ុនផ្សេងៗ ដែលផ្តោតទៅលើការអប់រំពាក់ព័ន្ធនឹងបច្ចេកវិទ្យា និង វិស័យកម្ម (STEM education), បច្ចេកវិទ្យា drone, generative AI និង ការផលិតដ៏ឆ្លាតវៃ (smart manufacturing)។ នេះហើយជាដំណើរដើមទងដែល ឯកឧត្តម បានអភិវឌ្ឍ៍ខ្លួន ក៏ដូចជាពង្រីកអាជីវកម្មក្លាយជាក្រុមហ៊ុនធំដូចសព្វថ្ងៃ៕
ប្រភព៖ Prestige
