កៀកនឹងខែឧសភា ខិតជិតមកដល់ នៅថ្ងៃទី ២៧ ខែមេសា ឆ្នាំ ២០២៥ លោកគ្រូ ចិនសែ ម៉ុង ដែលគេស្គាល់ថាជាគ្រូហុងស៊ុយ ដ៏មានប្រជាប្រិយភាព បានចែករំលែកពីរឿងដែលត្រូវប្រុងប្រយ័ត្នខ្ពស់នៅក្នុងខែឧសភា ដោយសារតែតាមក្បួនហុងស៊ុយ ខែឧសភា ជាខែម្សាញ់ ដែលជាខែជាន់ឆ្នាំខ្លួនឯងក្នុងឆ្នាំ ២០២៥ ហើយជាខែធាតុមាស ជាធាតុមិនសូវហាក់ជាមួយធាតុប្រចាំឆ្នាំ ២០២៥ ថែមទៀតផង។
ក្នុងករណីនេះ លោកគ្រូចិនសែ ម៉ុង បានប្រាប់នូវរឿង ៤ យ៉ាង ដែលត្រូវប្រយ័ត្នក្នុងខែឧសភា នេះ ដែលមានដូចជា ៖
១. មុខរបរលក់ទិញដូរ គ្រឿងអលង្ការនានា ជាមុខរបរដែលងាយរងផលប៉ះពាល់ ដូចជាមានការខាតបង់ បាត់គ្រឿងអលង្ការនានា ជាពិសេសគឺអាចមានបញ្ហាខូចឈ្មោះ ឬស្អុយឈ្មោះ និយាយជារួមគឺត្រូវប្រយ័ត្នគ្រប់ជ្រុង។
ដំណោះស្រាយ បើកអំពូលក្នុងហាងឱ្យភ្លឺ ហើយថៅកែហាងទាំងអស់ពុំគួរចេញក្រៅផ្ទះ ឬធ្វើដំណើរចេញក្រៅនៅចន្លោះម៉ោង ៤ ដល់ ៤៖៣០ រសៀលទេ អាចរង់ចាំផុតម៉ោងនេះសិនចាំចេញដំណើរ។
២. អ្នកឆ្នាំកុរ ហើយប្រកបរបរសិល្បៈច្រៀង សម្ដែង រាំ ផ្សព្វផ្សាយនានា ក្នុងចំណោម ១០០ នាក់ អាចមាន ២ នាក់ ប្រឈមជាមួយគ្រោះថ្នាក់ខូចបង់ឈ្មោះ ឬ គ្រោះថ្នាក់អំឡុងពេលសម្ដែង គួរប្រើប្រាស់សម្លៀកបំពាក់ក្រហមពេលសម្ដែង តិច ឬ ច្រើន តាមកាលទេសជាក់ស្ដែង។
៣. ករណីគ្រោះថ្នាក់បាក់ធ្លាក់ដែក គឺអាចមានកើតឡើងច្រើនករណី ក្នុងនោះអាចមានត្រូវចំមនុស្ស ឬ មិនចំមនុស្ស គួរកុំទៅតំបន់មានដែកច្រើន ឬ ការដ្ឋាន។
៤. បុគ្គលិកធនាគារ ចំពោះផ្នែកប៉ះពាល់សាច់លុយផ្ទាល់ដៃ អាចប្រឈមជាមួយការខាតបង់ បាត់ប្រាក់ ជាពិសេសបញ្ហាចំណងស្នេហា រវាងសង្សារ រវាងគូដណ្ដឹង រវាងប្ដីប្រពន្ធជាដើម គួរប្រើប្រាស់កន្សែងជូតខ្លួន ឬស្រោមពូក ពណ៌ត្នោត ឬកាហ្វេទឹកដោះគោ៕
