ជាការពិតណាស់ ក្រោយពីការប៉ះទង្គិចគ្នារវាងកងទ័ពកម្ពុជា និង កងទ័ពថៃ ដែលបានកើតឡើងនៅព្រឹកថ្ងៃទី ២៨ ខែឧសភា ឆ្នាំ ២០២៥ នៅភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ កាលពីពេលកន្លងទៅនេះ បានធ្វើឱ្យប្រជាជនកម្ពុជាកំពុងមានការយកចិត្តទុកដាក់យ៉ាងខ្លាំង។
ក្នុងនោះ គេសង្កេតឃើញប្រជាជនកម្ពុជាកំពុងស្រុះដៃគ្នា ប្រមូលថវិកា និង ស្បៀងអាហារជូនដល់កងទ័ព ដែលកំពុងឈរជើងនៅគោលដៅ ខណៈកងទ័ពបានធ្វើារការចល័តកម្លាំង និង អាវុធទៅព្រំដែន ដើម្បីការអនុវត្តផែនការបម្រុង ក្នុងការការពារបូរណភាពទឹកដីកម្ពុជាផងនោះ។
ងាកទៅកាន់ ឧកញ៉ា ព្រាប សុវត្ថិ និង ក្រុមគ្រួសារឯណោះវិញ ក៏មិនបង្អង់នោះឡើយ ដោយឧកញ៉ា និង ក្រុមគ្រួសារក៏បានចូលរួមចំណែកនៃការឧត្ថម្ភថវិកាជូនដល់បងប្អូនកងទ័ពជួរមុខនូវទឹកប្រាក់ចំនួន ១២០ លានរៀល ផងដែរ។
ក្នុងនោះដែរ ឧកញ៉ា ព្រាប សុវត្ថិ ក៏បានបង្ហោះសំណេរផ្តល់កម្លាំងចិត្តពីចម្ងាយដល់កងទ័ពជួរមុខថា៖ «ស្ថិតក្នុងពេលវេលា ដែលយើងទាំងអស់គ្នា ជាជនរួមជាតិខ្មែរតែមួយ ត្រូវរួបរួមគ្នាជាមហាកម្លាំង គ្រួសារខ្មែរ ជួយផ្ដល់កម្លាំងកាយ កម្លាំងចិត្ត ទាំងស្មារតី ទាំងអ្វីៗគ្រប់យ៉ាង ដើម្បីតបស្នងដល់ទឹកចិត្តស្នេហាជាតិមាតុភូមិរបស់បងៗកងទ័ពទាំងអស់ ជាពិសេសបងៗកងទ័ព នៅសមរភូមិមុខទាំងអស់ ដែលបានលះបង់សាច់ស្រស់ ឈាមស្រស់ការពារសេចក្ដីសុខសាន្ដជូនជាតិ និង មាតុភូមិ ។ ក្នុងពេលវេលានេះខ្ញុំបាទ និងក្រុមគ្រួសារសូមចូលរួមចំណែកឧបត្ថម្ភ ១២០ លានរៀល ទៅបងៗប្អូនៗកងទ័ពជួរមុខតាមរយៈអ្នកឧកញ៉ាឡេងណាវ៉ាត្រា (ប្រធានយុវជនបូជាការពារយុត្តិធម៌)»៕
