ប្រផ្នូលអីចេះ! នៅចិន កើតមានរឿងចម្លែក ប្រទះឃើញសុទ្ធតែធ្មេញមនុស្សក្នុងឌីមសាំ នំខេក និងចំណីអាហារផ្សេងជាច្រើនករណី

ថ្មីៗនេះ មហាជននៅឯប្រទេសចិន កំពុងតែមានការការភ្ញាក់ផ្អើល និងការព្រួយបារម្ភចំពោះការប្រទះឃើញមានធ្មេញមនុស្សនៅក្នុងចំណីអាហារជាច្រើនករណី។

តាមព័ត៌មានបានឱ្យដឹងថា ករណីទីមួយ គឺបានកើតឡើងកាលពីដើមខែតុលា​ ឆ្នាំ ២០២៥ កន្លងទៅ នៅខេត្ត Jilin ដោយមានស្រ្តីម្នាក់ បានប្រទះឃើញធ្មេញដាក់ចំនួន ៣ គ្រាប់ជាប់គ្នានៅក្នុងសាច់ក្រកដែលបានទិញនៅតាមផ្លូវ។ ដំបូងខាងអ្នកលក់បានបដិសេធ តែនៅពេលអាជ្ញាធរចុះទៅត្រួតពិនិត្យ គេក៏បានចេញមុខសុំទោសវិញ។ នៅក្នុងថ្ងៃដដែលនោះ មានស្រ្តីម្នាក់ទៀត បានឱ្យដឹងថាឪពុករបស់នាងបានឃើញធ្មេញ ២ គ្រាប់នៅក្នុងឌីមសាំមួយ នាភោជនីយដ្ឋានដ៏ល្បីមួយក្នុងទីក្រុង Dongguan ខេត្ត Guangdong។ ខាងភោជនីយដ្ឋាន ក៏បានសហការឱ្យអាជ្ញាធរចុះត្រួតពិនិត្យរួចរាល់។

លុះដល់ថ្ងៃទី ១៤ ខែតុលា​ ឆ្នាំ ២០២៥ នៅទីក្រុងសៀហៃ មាននារីម្នាក់បានប្រទះឃើញធ្មេញដាក់នៅក្នុងនំខេកដែលនាងបានទិញពីហាងបោះដុំមួយកន្លែង ខាងហាងបានបដិសេធ លុះនារីខាងលើរកដាក់ពាក្យបណ្តឹងខាងហាងបានស្នើសំណងមកនាងប្រហែលជាង ១០០ ដុល្លារ​ តែនាងក៏បានបដិសេធវិញ។ ដោយឡែក មានមហាជនជាច្រើនបាននាំគ្នាបញ្ចេញមតិថា សង្ឃឹមថានេះមិនមែនជាលាយសាច់មនុស្សនៅក្នុងអាហារដូចជានៅក្នុងខ្សែភាពយន្តទៅចុះ៕

ប្រភព៖ SCMP