កាលពីពេលថ្មីៗនេះ អ្នកលេងបណ្តាញសង្គមហ្វេសប៊ុក ជាពិសេសអ្នកនៅក្នុងរង្វង់សិល្បៈជាច្រើន បានផ្ទុះការជជែកវែកញែកនូវវីដេអូមួយរបស់តារាភាពយន្តជើងចាស់ អ្នកស្រី ច័ន្ទ តារាទី ដែលលើកឡើងមិនពេញចិត្តនៅពេលគេហៅខ្លួនថា ម៉ែ។ ប៉ុន្តែ ការពិតទៅវីដេអូពេញ នៃការលើកឡើងរបស់អ្នកស្រី ច័ន្ទ តារាទី ក៏បានបញ្ជាក់ដែរថា មូលហេតុដែលអ្នកស្រី ច័ន្ទ តារាទី មិនសូវពេញចិត្តឱ្យគេហៅ ម៉ែៗនោះ ក៏ព្រោះតែស្តាប់ទៅដូចទៅជារឿងផ្សេង ដូចជាហៅម៉ែយ៉ែមៗ ជាដើម។
ក្រោយបន្តមានការវែកញែក បញ្ចេញមតិរៀងៗខ្លួនពីមហាជ និង អ្នកក្នុងរង្វង់សិល្បៈផងនោះ កូនប្រុសបង្កើតរបស់អ្នកស្រី ច័ន្ទ តារាទី ក៏បានចេញមកបង្ហោះបកស្រាយបន្ថែម ដែលម្តាយមិនចង់ឱ្យគេហៅថា ម៉ែ។ ម្យ៉ាងវិញទៀតនោះ កូនប្រុសរបស់អ្នកស្រី ច័ន្ទ តារាទី ក៏បានឱ្យដឹងថា ម្តាយមិនបានហាមបងប្អូនមិនឱ្យហៅគាត់ថា បងស្រី អ្នកមីង អ៊ុំស្រី ឬលោកយាយឯណា ព្រោះពាក្យរបស់ខ្មែរយើង គឺមានគ្រប់គ្រាន់សម្រាប់ប្អូនយកទៅប្រើប្រាស់បានតាមកាលៈទេសៈ។
ដោយឡែក ងាកមកកាន់សាមីខ្លួន គឺអ្នកស្រី ច័ន្ទ តារាទី ឯណោះវិញ ក្រោយឃើញកូនប្រុសបង្ហោះសារបែបនេះហើយ អ្នកស្រីក៏បានចែករំលែក និង អមនូវសារមួយសួរទៅកាន់មហាជនវិញថា៖ «គ្រាន់តែមិនឱ្យអ្នកដទៃហៅខ្ញុំថា ម៉ែ តើខ្ញុំមានកំហុសដែរមែនទេ?»៕
