កាលពីថ្ងៃទី ៧ ខែកក្កដា ឆ្នាំ ២០២៥ កន្លងទៅនេះ លោក Pantep Puaphongphan ជាប្រធានមូលនិធិឆ្មាំយាមដែនដី បានឱ្យដឹងថា ខ្លួននឹងប្រើលុយបរិច្ចាគពីប្រជាជនថៃ យកទៅទិញដ្រូនដើម្បីឱ្យទាហានភូមិភាគ ២ បានប្រើនៅខែ សីហា ខាងមុខនេះ។
Pantep Puaphongphan បានឱ្យដឹងនៅតាមរយៈបណ្តាញហ្វេសប៊ុកផ្ទាល់ខ្លួនថា លោកបានបើកកិច្ចប្រជុំជាមួយនឹងតំណាងមេទ័ពភូមិភាគ ២ ព្រមទាំងព្រះចៅអធិការវត្ត Pa Si Saeng Tham រួមជាមួយនឹងក្រុម Santi Asoke ដើម្បីពិភាក្សាគ្នា ក្នុងការយកលុយបរិច្ចាគរបស់ប្រជាជនក្រោមមូលនិធិចំនួន ២៥ លានបាត ដែលស្មើប្រមាណជាង ៧៧ ម៉ឺនដុល្លារ ទៅទិញដ្រូនបន្ថែមទៀត សម្រាប់បញ្ជូនឱ្យក្រុមទាហានកងទ័ពភូមិភាគ ២ បានប្រើប្រាស់ទៅតាមតម្រូវការ។
ដោយឡែក ខាងមូលនិធិនឹងបន្ថែមទឹកប្រាក់ចំនួន ២ លានបាតទៀត ដែលស្មើប្រមាណ ៦ ម៉ឺនដុល្លារ ដើម្បីឧបត្ថម្ភដល់សុខមាលភាពកងទ័ពភូមិភាគ ២។ សម្រាប់ដ្រូនវិញ ខាងមូលនិធិនឹងចាត់ចែងរៀបចំទិញ ក៏ដូចជាប្រគល់ដល់កងទ័ពនៅខែ សីហា ខាងមុខនេះ៕
ប្រភព៖ AMARINTV
