ប្រណីត! ចិញ្ចៀនដកស្រង់ពីចម្លាក់ខ្មែរ មានរូបនាគក្បាល ៩ រូបអង្គរវត្ត ច្នៃដោយបរទេសម្នាក់ដាក់លក់បានតម្លៃរាប់ពាន់ដុល្លារ

Orloff of Denmark គឺជាក្រុមហ៊ុនគ្រឿងអលង្ការលក្ខណៈគ្រួសារមួយ ត្រូវបានបង្កើតឡើងនៅក្នុងឆ្នាំ ១៩៩៤ ដោយស្ថាបនិក Orloff Ehrenskjöld។ លោក Orloff Ehrenskjöld គឺជាអ្នកច្នៃម៉ូដគ្រឿងអលង្ការដ៏ល្បីម្នាក់ ហើយក៏មានជំនាញខាងត្បូង ដែលបានបញ្ចប់ការសិក្សាពីវិទ្យាស្ថាន GIA ឬ Gemological Institute of America ជាវិទ្យាស្ថានត្បូងពេជ្រដ៏ល្បីល្បាញនៅសហរដ្ឋអាមេរិក។

ថ្មីៗនេះ លោក Orloff Ehrenskjöld បានធ្វើឱ្យពិភពលោកចាប់អារម្មណ៍យ៉ាងខ្លាំង ដោយលោកបានបញ្ចេញម៉ូដចិញ្ចៀន ដកស្រង់ពីចម្លាក់ខ្មែរតាមប្រាសាទក្នុងខេត្តសៀមរាប។ ជាមួយគំនិតដងស្រង់មានដូចជា នាគ តោ ប្រាសាទអង្គរវត្ត និង ស្ពានកំពង់ក្តី បុរសអ្នកច្នៃម៉ូដរូបនេះក៏បានបង្ហោះជារូបភាព ដែលលោកបានមកទស្សនាផ្ទាល់ដល់ទីតាំង ហើយម៉ូដនីមួយៗសុទ្ធតែបង្ហាញពីប្រភពដើមច្បាស់លាស់។

លោកបានសរសេរភ្ជាប់ការបង្ហោះនៅលើបណ្តាញសង្គម ដែលយើងបានបកប្រែជាភាសាខ្មែរយ៉ាងដូច្នេះថា៖ «បោះជំហានទៅក្នុងប្រវត្តិសាស្ត្រជាមួយចិញ្ចៀនបុរាណខ្មែរដ៏អស្ចារ្យទាំងនេះ! ការរចនាបំផុសគំនិតពី​ សត្វនាគ តោ ប្រាសាទអង្គរវត្ត និង ស្ពានកំពង់ក្តីបុរាណ គ្រប់ម៉ូដប្រាប់ពីរឿងរ៉ាវនៃភាពអេឡេហ្គង់មិនចេះហួសសម័យ និង បេតិកភណ្ឌវប្បធម៌។ ម៉ូដទាំងនេះល្អឥតខ្ចោះសម្រាប់បន្ថែមភាពអាថ៌កំបាំងទៅក្នុងស្ទាយ៌របស់អ្នក។ តើមួយណាដែលអ្នកចូលចិត្តជាងគេ?»។

បើតាមការដាក់លក់នៅលើគេហទំព័រ 1stdibs ចិញ្ចៀនម៉ូដចម្លាក់ខ្មែរទាំងនេះ អាចដាក់លក់បានក្នុងតម្លៃខ្ទង់ពាន់ដុល្លារ។ ជាក់ស្តែង ដូចជាចិញ្ចៀនរូបប្រាសាទអង្គរវត្ត ដាក់លក់តម្លៃ ៦០០០ ដុល្លារ(មិនទាន់បញ្ចុះតម្លៃ) រីឯចិញ្ចៀននាគតម្លៃ ៤៨០០ ដុល្លារ (មិនទាន់បញ្ចុះតម្លៃ)។ កាន់តែពិសេស ត្បូងដែលដាំលើចិញ្ចៀន គឺប្រើត្បូងខ្មែរផងដែរ៕​