កន្លងមក លោក Sool Cool ទទួលបានការគាំទ្រខ្លាំងទៅលើស្នាដៃដំឡើងឈុត ជាពិសេស ឈុតបុរាណខ្មែរ ដែលជាឈុតតួអង្គផ្សេងៗទៅតាមសម័យកាល។ ហើយរយៈក្រោយនេះ លោកក៏បានបង្ហាញស្នាដៃថ្មីបន្ថែមទៀត ដែលធ្វើឱ្យមហាជនផ្ទុះការចាប់អារម្មណ៍កាន់តែខ្លាំងផងដែរ។
ជាក់ស្តែង តាមរយៈទំព័រហ្វេសប៊ុក De PAGE studio ដែលជាស្ទូឌីយោថតរូបរបស់លោក Sool Cool ផ្ទាល់ លោកបានបង្ហាញរូបភាពជាបន្តបន្ទាប់ នូវស្នាដៃដំឡើងឈុតបុរាណមានឈ្មោះថា «រាជធីតាក្សត្រ»។ ឈុតនេះបង្ហាញពីរាជធីតាក្សត្រ ដែលជាក្សត្រស្រី្តនគរទាំង ១២ (៩ អង្គស្រី្ត និង ៣ ស្រ្តីសាមន្តរដ្ឋ)។
ឈុតដែលដំឡើង និង ដាក់ឈ្មោះ ដោយលោកផ្ទាល់នេះ ត្រូវបានដកស្រង់ឬចម្លងពីចម្លាក់ប្រាសាទតាព្រហ្ម ស្ថិតលើទឹកដីខេត្តសៀមរាប។ តាមការបញ្ចេញរូបភាព មកទល់ពេលនេះ លោកដំឡើងឈុតនេះបានចំនួន ៨ អង្គមកហើយមានដូចជា៖ ១) នាម រាមពិជ័យឧទសោមមារាទេវី, ២) នាម សុរិយៈបរមីស្រីឧត្តម, ៣) នាម អគសុយៈនាគទេវី , ៤) នាម ស្វាសុរិយៈនាគគី , ៥) នាម អរុណ៍សូរីយ៉ាបរមី, ៦) នាម សេតា វីល័យសេរីភតៈយៈ, ៧) នាម សុរិយៈនាគទេពី និង ៨) នាម បុស្បាអតម៊ីរ៉ាមរ័ត្ននា។ ហើយឈុតអង្គបន្ទាប់ លោកទំនងជាបង្ហាញនាពេលឆាប់ៗខាងមុខ៕
