ប្រណីតខ្លាំង! លោក Sool Cool ចំណាយពេលសន្សំគ្រឿងបុរាណច្រើនឆ្នាំ នឹងត្រៀមបង្ហាញទ្រង់ទ្រាយធំឆាប់ៗ

កន្លងមក លោក Sool Cool បានធ្វើឱ្យមហាជនផ្ទុះការចាប់អារម្មណ៍យ៉ាងខ្លាំងជាមួយការដំឡើងឈុតបុរាណ ដែលធ្វើឡើងទាំងសម្រាប់ការថតរូបភាព និង ភាពយន្ត។ សំងំដំឡើងគ្រឿង និង សម្លៀកបំពាក់មួយរយៈ ឆាប់ៗនេះ លោកនឹងត្រៀមបង្ហាញស្នាដៃថ្មី ដែលមកជាលក្ខណៈទ្រង់ទ្រាយធំ។

ជាក់ស្តែង តាមរយៈគណនីហ្វេសប៊ុកផ្ទាល់ខ្លួន លោក Sool Cool បានបង្ហោះរូបភាពតួអង្គគ្រងឈុតបុរាណ ដែលមើលមកពិតជាប្រណីត និង លម្អិតឥតខ្ចោះតាំងសម្លៀកបំពាក់ គ្រឿងលម្អ និង ការតុបតែងមុខធ្វើសក់។ លោកបានសរសេរភ្ជាប់នឹងរូបភាពដែរថា៖ «ខ្ញុំចំណាយពេលស្ងាត់ស្ងៀមច្រើនឆ្នាំ ដើម្បីសន្សំគ្រឿងទាំងអស់នេះ ពេលនេះសង្ឃឹមថា បងប្អូនកាន់តែស្គាល់រសនិយមនៃការផលិតរបស់ខ្ញុំកាន់តែច្បាស់ ហើយខ្ញុំនឹងប្រឹងប្រែង បើបងប្អូនត្រូវការខ្ញុំក្នុងសង្គមនេះ!»។

បើតាមទំព័រហ្វេសប៊ុក De PAGE studio ដែលជាស្ទូឌីយ៉ូថតរូបរបស់លោក លោកក៏បានបង្ហោះរូបភាពដូចគ្នា និង សរសេរដែរថា៖ «នេះជាឈុតមួយក្នុងចំណោមឈុតនៅក្នុងផ្ទៃរឿងទាំងអស់ ដែលខ្ញុំបានរៀបចំដំឡើង និង កែសម្រួល ហើយវាក៏មិនចាកឆ្ងាយពីគ្រោងដើមដែរ។ អ្វីដែលខ្ញុំចង់បង្ហាញមហាជន គឺសិល្បៈខ្មែរ «ចម្លាក់» កំពុងតែឈររង់ចាំបងប្អូន​ឱ្យ​ជួយ​ទាញពួកគាត់ចេញពីភាពងងឹតនៃពេលវេលាផង! ស្នាដៃមួយនេះ សូមឧទ្ទិសទៅដល់បុព្វបុរស និង សាសនាបុព្វបុរសទាំងអស់ សូមលោកទទួលយកនូវការគោរពនឹងដឹងគុណពីខ្ញុំផង»៕