កាលពីថ្ងៃទី ៨ ខែកញ្ញា ឆ្នាំ ២០២៥ កន្លងទៅនេះ នៅខេត្តរ៉ាក់យ៉ង ប្រទេសថៃ មានករណីក្រពើមួយក្បាលប្រវែងជាង ២ ម៉ែត្រ បានបង្ហាញខ្លួននៅតាមផ្លូវ ដែលកំពុងជន់លិចទៅដោយជំនន់ទឹកភ្លៀង បង្កឱ្យអ្នកដំណើរមានការចលាចលភ័យខ្លាច។
តាមព័ត៌មានបានឱ្យដឹងថា ក្រពើមួយក្បាលនេះដែលមានប្រវែងជាង ២ ម៉ែត្រ ត្រូវបានគេប្រទះឃើញនៅតាមផ្លូវមួយកន្លែងនាភូមិលេខ ១៤ ឃុំម៉ាខាមឃុយ ស្រុកនិគមផាត់ថាណា ខេត្តរ៉ាក់យ៉ង កាលពីយប់ថ្ងៃទី ៨ ខែកញ្ញា ឆ្នាំ ២០២៥ កន្លងទៅនេះ ខណៈទឹកជំនន់កំពុងតែចាប់ផ្តើមលិចនៅតាមផ្លូវ។
យ៉ាងណាមិញ ក្រោយពីឃើញវត្តមានរបស់ក្រពើមួយក្បាលនេះ អ្នកស្រុកអ្នកភូមិមានការភ័យខ្លាចជាខ្លាំង ចំណែកឯអាជ្ញាធរក៏មិនទាន់ដឹងថាក្រពើមួយក្បាលនេះបានរួចចេញពីណាមកដែរ ដោយបានត្រឹមតែប្រាប់ប្រជាជនឱ្យមានការប្រុងប្រយ័ត្ន និងហាមធ្វើការនេសាទនៅតំបន់នោះជាបណ្តោះអាសន្នសិន៕
ប្រភព៖ Khaosod
