ពិតណាស់ កម្មវិធីប្រកួតសម្រស់ដ៏អស្ចារ្យលំដាប់អន្តរជាតិ Miss Universe 2025 លើកទី ៧៤ បានប្រកាសជាផ្លូវការហើយនូវដំណើរការប្រកួត ដែលនឹងរៀបចំធ្វើឡើងនៅឯប្រទេសថៃ ចាប់ពីថ្ងៃទី ២ ដល់ថ្ងៃទី ២១ ខែវិច្ឆិកា ឆ្នាំ ២០២៥ ខាងមុននេះ។
ងាកមកមើលបវរកញ្ញាកម្ពុជា Miss Universe Cambodia 2025 អ្នកនាង ហ្វីយ៉ាតា វិញ ស្របពេលកម្មវិធីអន្តរជាតិប្រកាសជាផ្លូវការនៃដំណើរការប្រកួត ក៏បានឃើញបណ្ដាញសង្គមរបស់នាង និង វីដេអូកិច្ចសម្ភាសបានប្រកាសឱ្យដឹងថា នាងបានសម្រេចចិត្តជាផ្លូវការថានឹងទៅតំណាងប្រទេសចូលរួមប្រកួតលើឆាកអន្តរជាតិ MU 2025 នៅប្រទេសថៃ។
លើសពីនេះ ដ្បិតតែមានការព្រួយបារម្ភខ្លាំងពីមហាជនអ្នកគាំទ្រកម្ពុជាចំពោះសុវត្ថិភាពរបស់បវរកញ្ញារូបនេះ ក្នុងការទៅប្រកួតនៅប្រទេសថៃ តែសម្រាប់អ្នកនាង ហ្វីយ៉ាតា នៅតែបង្ហាញការតាំងជំហរយ៉ាងហ្វាហាប់ មោះមុតបំផុតក្នុងការយកទង់ជាតិកម្ពុជាទៅលើឆាកអន្តរជាតិនេះឱ្យបាន ទោះត្រូវជួបនឹងឧបសគ្គបែបណាក៏ដោយ។
យ៉ាងណាមិញ ក្រោយប្រកាសសម្រេចចិត្តទៅប្រកួតជាផ្លូវការ ពេលនេះ បវរកញ្ញា ហ្វីយ៉ាតា ក៏កំពុងស្វះស្វែងត្រៀមខ្លួនយ៉ាងសកម្ម ទាំងសមត្ថភាព និង ការរៀបចំខ្លួន ក៏ដូចជាឈុតសម្លៀកបំពាក់ផ្សេងៗត្រៀមយកទៅប្រកួតលើឆាកអន្តរជាតិនេះ។
ក្នុងនោះ ក៏បានឃើញហ្វេសប៊ុករបស់អ្នកនាង ហ្វីយ៉ាតា បង្ហោះពីការត្រៀមខ្លួនរួចរាល់ ដែលអ្នកនាងបានត្រៀមឈុតរហូតដល់ទៅ ៦៣ ឈុតសម្រាប់ស្លៀកក្នុងដំណើរការប្រកួតកម្មវិធីអន្តរជាតិដ៏អស្ចារ្យនេះ មិនឱ្យចាញ់បវរកញ្ញាមកពីប្រទេសដទៃឡើយ។
សារនោះ MUC 2025 រូបនេះ បានរៀបរាប់ថា ៖ «1000 រឿងត្រូវរៀបចំ ចាត់ចែង ពេលក៏មិនច្រើន គេងមិនលក់ទេ តែគ្រប់យ៉ាងត្រូវតែរួចរាល់.. គម្រោងតែ 60 ឈុតទេ តែឥឡូវ confirm បាន 63 ឈុតហើយ.. នៅរឿងឆ្វេង ស្ដាំផ្សេងៗទៀត.. អ្វីដែលត្រូវការពីអ្នកទាំងអស់គ្នា គឺកម្លាំងចិត្ត»៕
