Thammika Songkaeo នាងជាអ្នកនិពន្ធសៀវភៅដ៏ល្បីមួយរូប បានចែករំលែករឿងគួរឱ្យសោកស្តាយមួយនៅក្នុងជីវិត ដោយសារតែថ្នាំលេបព្យាបាលសក់ជ្រុះ វាបានធ្វើឱ្យប្តីរបស់នាងបាត់បង់ចំណង់ផ្លូវភេទ ហើយបំផ្លាញជីវិតអាពាហ៍ពិពាហ៍ទាំងស្រុង។ ទាក់ទងនឹងរឿងនេះ នាងបានចូលខ្លួនរៀបរាប់នៅក្នុងកម្មវិធី podcast មួយឈ្មោះថា «Moral Medicine»។
នាងបានសម្គាល់ប្តីតាំងពីពេលនៅជាសង្សារនឹងគ្នាម្ល៉េះ ដែលអាអូនតូចរបស់ប្តីនាងមិនដំណើរការល្អទាល់តែសោះ។ ប្តីនាងបានប្រាប់ថា ដោយសារតែការលេបថ្នាំព្យាបាលសក់ជ្រុះប្រភេទ Propecia ជាម៉ាកឱសថ finasteride ទើបធ្វើឱ្យប្តីនាងជួបបញ្ហាបែបនេះ។ ជាក់ស្តែង ក្រោយលេបថ្នាំ Propecia វាផ្តល់ផលរំខានចម្បង គឺធ្វើឱ្យមុខងារផ្លូវភេទចុះខ្សោយ។
ដំបូងនាងបានគិតថា វាគ្រាន់តែជាករណីកើតឡើងក្នុងរយៈពេលខ្លី ឬកើតឡើងម្តងម្កាល។ នាងបានឱ្យប្តីប្រើថ្នាំជំនួយផ្លូវភេទ បន្ទាប់មករៀបការរស់នៅជាមួយគ្នាអស់រយៈពេល ៧ ឆ្នាំ។
ក្រោយកសាងគ្រួសារមានកូនស្រីម្នាក់ Songkaeo នាងបែរជាមានភាពឯកាទៅវិញ។ នាងស្ទើរតែមានគំនិតសម្លាប់ខ្លួនម្តងៗ ដោយសារគ្មានក្តីសុខផ្លូវភេទ។ ចុងក្រោយ នាងបានសម្រេចចិត្តដើរចេញពីជីវិតអាពាហ៍ពិពាហ៍ ប៉ុន្តែនៅតែរាប់អានប្តីជាមិត្តភក្តិធម្មតា ដោយសារប្តីនាងជាមនុស្សល្អ។
ជាមួយបទពិសោធនេះ នាងបានសរសេរប្រលោមលោកមួយចំណងជើង Stamford Hospital ដែលបានក្លាយជាសៀវភៅលក់ដាច់បំផុត លំដាប់លេខ ១ នៅលើគេហទំព័រ Amazon Singapore។ នៅក្នុងសៀវភៅ នាងមិនត្រឹមតែលើកឡើងអំពីសញ្ញានៃការប្រើប្រាស់ថ្នាំ finasteride ប៉ុណ្ណោះទេ តែថែមទាំងប្រាប់ពីផលប៉ះពាល់ ក្រោយពេលប្រើប្រាស់ ដែលមានឥទ្ធិពលទៅលើរាងកាយ ជាពិសេស មនុស្សដែលខ្លួនស្រលាញ់ផងដែរ។
ចំពោះប្តីនាង ផលប៉ះពាល់នៃថ្នាំ finasteride រួមមាន៖ កើតថប់បារម្ភ, វិលមុខ, និយាយមិនច្បាស់, ចំណង់ផ្លូវភេទធ្លាក់ចុះ, ប្រដាប់ភេទមិនឡើងរឹង និង ប្រែប្រួលទំហំ។
មែនទែនទៅ បញ្ហានេះធ្លាប់កើតលើបុរសម្នាក់ ដែលធ្លាប់ចូលសម្ភាសក្នុងកម្មវិធី podcast ខាងលើ ដោយបុរសរូបនោះឈ្មោះ Millich អាយុ ២៨ ឆ្នាំ។ ផលប៉ះពាល់របស់លោកមានដូចជា៖ ធ្លាក់ចុះចំណង់ផ្លូវភេទ, ដេកមិនលក់, ទម្ងន់ និង សាច់ដុំថយចុះ, ស្បែកឡើងកន្ទួល និង ចុករោយនៅអាងត្រគាក៕
ប្រភព៖ NYP
