ថ្មីៗនេះ នៅប្រទេសថៃមានករណីប្តីប្រពន្ធមួយគូ ដែលបានឈ្លោះគ្នាបែកទឹកបែកដីផ្អើលអស់គេឯង លុះសម្រេចចិត្តមកត្រូវគ្នាវិញបានតែមួយថ្ងៃ ស្រាប់តែខាងស្រីស្លាប់ចោលខាងប្រុសបាត់។
រឿងរ៉ាវមួយនេះបានកើតឡើងនៅខេត្ត Chai Nat ដោយស្រ្តីជាប្រពន្ធមានវ័យ ៥៦ ឆ្នាំ រីឯបុរសជាប្តីមានវ័យ ៤៦ ឆ្នាំ ហើយអ្នកទាំងពីរមានកូនស្រីវ័យ ៧ ឆ្នាំម្នាក់ជាចំណងដៃ។ តាមព័ត៌មានបានឱ្យដឹងថា តាមពិតទៅអ្នកទាំងពីរបានលែងគ្នាម្តងរួចទៅហើយ ដោយខាងប្រុសចេញទៅមានគ្រួសារថ្មី តែថ្មីៗនេះខាងប្រុសក៏បានត្រឡប់មកយកម៉ូតូទៅជិះទៅធ្វើការ តែខាងស្រីមិនឱ្យ ទើបមានការឈ្លោះទាស់ទែងគ្នាយ៉ាងខ្លាំង រហូតសមត្ថកិច្ចចុះមកសម្របសម្រួល។
យ៉ាងណាមិញ ក្រោយមក សុខៗគេក៏ឃើញខាងប្រុសមករស់ជាមួយប្រពន្ធវិញ មកមើលថែប្រពន្ធហាក់ដូចជាគ្មានអ្វីកើតឡើង ព្រោះប្រពន្ធចាស់ និង មានជំងឺច្រើនក៏ខ្លួននៅតែស្រឡាញ់ ហើយថែមទាំងបានឱបថើបគ្នាបង្ហាញក្តីស្រឡាញ់ឱ្យអ្នកកាសែតមើលទៀត។
ដោយឡែក ស្រាប់តែមកដល់ថ្ងៃទី ១៤ ខែមីនា ឆ្នាំ ២០២៥ នេះ ស្រ្តីជាប្រពន្ធក៏បានសន្លប់បាត់មាត់បាត់-ក រួចក៏ត្រូវបានគេបញ្ជូនទៅមន្ទីរពេទ្យ តែក៏ស្លាប់បាត់បង់ជីវិតនៅវេលាក្រោយមក ដោយសារតែការលាកតម្រងនោមធ្ងន់ធ្ងរ។ ក្នុងនោះដែរ បុរសជាប្តីពិតជាមានការសោកស្តាយខ្លាំងណាស់ ព្រោះទើបតែត្រូវគ្នាមិនបានប៉ុន្មានផង បែរជាប្រពន្ធចាកចេញទៅគ្មានថ្ងៃត្រឡប់៕
ប្រភព៖ AMARINTV
