ក្រោយរឿងព្យុះភ្លៀងពីកម្មវិធី MGI បានបញ្ចប់ស្ងប់ស្ងាត់ ឥឡូវនេះ ប៊ី សុធារី បានបង្ហោះសារប្រកាសនៅលើទំព័រហ្វេសប៊ុករបស់ខ្លួន ដែលនាងនឹងត្រលប់មកដាក់ពាក្យប្រកួតជាថ្មី ក្នុងកម្មវិធី Miss Cosmo Cambodia 2025។ ជាការសាទរសម្រាប់ការត្រលប់មកវិញ «ប្រជាប្រិយ» សូមលើកពីប្រវត្តិ ក៏ដូចជាបទពិសោធរបស់នាងនៅក្នុងវិស័យកម្មវិធីប្រកួតសម្រស់ រាប់ចាប់តាំងពីពេលនាងចាប់ផ្តើម រហូតមកដល់បច្ចុប្បន្ន។
ការដាក់ពាក្យចូលរៀនដើរម៉ូដនៅក្នុងក្រុមបង្ហាញម៉ូដមួយនៅទីក្រុងភ្នំពេញទឹកដីកំណើតរបស់ខ្លួន គឺជាដំណើរដើមទងនៃការចាប់ផ្តើមបោះជំហានលើវិស័យប្រកួតសម្រស់របស់ ប៊ី សុធារី។ ស្ថិតក្នុងវ័យ ១៤ ឆ្នាំ ដោយមានកម្ពស់ត្រូវស្តង់ដា និង មានសក្តានុពលលើវិស័យបង្ហាញម៉ូដ ក្រុមដើរម៉ូដខាងលើបានជួយជ្រោមជ្រែង ក៏ដូចជាបណ្តុះបណ្តាលឱ្យ ប៊ី សុធារី ចូលប្រកួតក្នុងកម្មវិធី Cambodia New Star Model Contest ធ្វើឡើងនៅចុងឆ្នាំ ២០១២។ ក្នុងការប្រកួតនេះ នាងទទួលបានជ័យលាភីលេខ ២ និង បានតំណាងឱ្យប្រទេសកម្ពុជាទៅប្រកួតនៅប្រទេសកូរ៉េខាងត្បូងនៅដើមឆ្នាំ ២០១៣។
ថ្វីដ្បិតជំហានដំបូងដណ្តើមមកុដមិនបានមកវិញ ប៉ុន្តែបវរកញ្ញាវ័យជំទង់រូបនេះទទួលបានបទពិសោធយ៉ាងច្រើន ដែលជាគ្រឹះរុញច្រាននាងឱ្យឆ្ពោះទៅប្រកួតកម្មវិធីបន្តបន្ទាប់ទាំងកម្មវិធីថ្នាក់ជាតិ និង អន្តរជាតិ។ ជាក់ស្តែង នៅឆ្នាំ ២០១៣ ប៊ី សុធារី នាងបានចូលប្រកួតកម្មវិធី Miss Tourism Queen Cambodia 2013 ដោយជាប់ជ័យលាភីលេខ ២ និង ទទួលបានពានរង្វាន់ Miss Photogenic ឬ បេក្ខនារីដែលថតរូបបានស្អាតជាងគេ។ ឆ្នាំ ២០១៣ ដដែល នាងបានចូលប្រកួតកម្មវិធី Miss Tourism Cambodia 2013 ដោយបានជាប់ជ័យលាភីលេខ ១ និង ត្រូវចេញទៅប្រកួតលើឆាកអន្តរជាតិក្នុងកម្មវិធី Miss Tourism International នៅឯប្រទេសម៉ាឡេស៊ី។ គ្រានោះ ដោយសារ ប៊ី សុធារី នាងមិនទាន់គ្រប់អាយុស្របតាមលក្ខន្តិក នាងត្រូវបានបវរកញ្ញាជ័យលាភីលេខ ២ ចេញមុខទៅប្រកួតជំនួញវិញ ។
តែយ៉ាងណាមិញមិនបានប៉ុន្មានថ្ងៃផង ប៊ី សុធារី ត្រូវបានខាងប្រទេសថៃអញ្ជើញចូលរួមប្រកួតក្នុងកម្មវិធីមួយទៀតគឺ Miss Asian។ មិនតែប៉ុណ្ណោះក្នុងឆ្នាំ ២០១៣ និង ឆ្នាំ ២០១៤ នាងត្រូវបានជ្រើសរើសតំណាងជាម៉ូឌែលកម្ពុជាទៅចូលរួម និង ទទួលពានក្នុងកម្មវិធីមួយនៅទីក្រុងសៃហ្គនប្រទេសវៀតណាមគឺ Winner Fashion Night។ ក្នុងឆ្នាំ ២០១៤ នេះដែរ នាងបានចូលប្រកួតកម្មវិធី Miss South Asia ធ្វើឡើងនៅប្រទេសថៃដោយទទួលបានពានរង្វាន់ Miss Elegance ឬបេក្ខនារីស្លៀកឈុតសូត្រស្អាតជាងគេ និង ពានរង្វាន់ Best Evening Wear ឬបេក្ខនារីស្លៀកឈុតសមោសស្អាតជាងគេ។
មកដល់ឆ្នាំ ២០១៥ នាងបានចូលប្រកួតកម្មវិធី Supper Model International ធ្វើឡើងនៅហ្វីលីពីន ដែលមានបេក្ខនារីមកពីជាង ៤០ ប្រទេសចូលរួម។ ក្នុងនោះនៅជុំបញ្ចប់នាងត្រូវបានប្រកាសឈ្មោះជាប់ជ័យលាភីលេខ ៣ ហើយនេះក៏ជាលើកទី ១ ដែរដែលនាងបានជាប់ជ័យលាភីនៅលើឆាកអន្តរជាតិតាមរយៈការខិតខំប្រឹងប្រែងកន្លងមក។
មកដល់ឆ្នាំ ២០១៦ នាងបានចូលប្រកួតកម្មវិធីថ្នាក់ជាតិធំជាងគេ គឺកញ្ញាឯកកម្ពុជាឬ Miss Cambodia 2016 ដោយឈ្នះជ័យលាភីលេខ១ និង ទទួលបានពានរង្វាន់ដល់ទៅ៥ស្ទួនគ្នា រួមមានជាអាទិ ពានរង្វាន់ Best in National Costume ឬបេក្ខនារីគ្រងឈុតប្រពៃណីស្អាតជាងគេ, ពានរង្វាន់ Best In Cocktail Dress ឬបេក្ខនារីគ្រងឈុតជប់លៀងស្អាតជាងគេ, ពានរង្វាន់ Best In Evening Gown ឬបេក្ខនារីគ្រងឈុតសមោលសរស្អាតជាងគេ, ពានរង្វាន់ Best In Khmer Traditional Gown ឬបេក្ខនារីគ្រងឈុតប្រពៃណីខ្មែរស្អាតជាងគេ និង ពានរង្វាន់បេក្ខនារីដែលមានសក់ស្អាតជាងគេ។
នៅឆ្នាំ ២០១៧ សុធារី បានបំពេញបំណងរបស់ខ្លួនមួយដោយបានក្លាយជាបវរកញ្ញាតំណាងឱ្យកម្ពុជាដំបូងគេចេញទៅប្រកួតកម្មវិធីអន្តរជាតិដ៏ធំធ្វើឡើងនៅសហរដ្ឋអាមេរិកគឺ Miss Universe។ នៅឆ្នាំ ២០១៨ នាងបានចូលរួមដើរបង្ហាញម៉ូដឱ្យកម្មវិធីធំមួយនៅប្រទេសហ្វីលីពីន និង មកដល់ឆ្នាំ ២០១៩ នាងបានចេញទៅទទួលពានជាតារាបង្ហាញម៉ូដប្រចាំកម្ពុជានៅក្នុងកម្មវិធី 2019 Asia Model Festival Seoul ដែលធ្វើឡើងនៅទីក្រុងសេអ៊ូលប្រទេសកូរ៉េ។ មកដល់ឆ្នាំ ២០២៣ នាងបានចេញទៅប្រកួតកម្មវិធី Miss Charm International នៅឯទីក្រុងសៃហ្គនប្រទេសវៀតណាម ដោយទទួលបានពានរង្វាន់មួយគឺ ឈុតតំណាងជាតិដែលស្អាតបំផុត។ ក្នុងឆ្នាំ ២០២៤ នាងក្លាយម្ចាស់មកុដ Miss Grand Cambodia 2024 ប៉ុន្តែបានបោះបង់តំណែងវិញ បន្ទាប់ពីមានរឿងចម្រូងចម្រាសអំឡុងប្រកួត MGI។
ការត្រលប់មកជាថ្មី ជាមួយការដាក់ពាក្យប្រកួតក្នុងកម្មវិធី Miss Cosmo Cambodia 2025 នាងក៏បានសុំក្តីស្រលាញ់ ជំនឿចិត្ត និង ឱកាសពីបងប្អូនខ្មែរឱ្យជឿជាក់លើរូបនាងម្តងទៀត ដើម្បីឱ្យនាងបន្តដំណើរទៅមុខ យកសមត្ថភាពទៅប្រកួតដណ្តើមមកុដនៅលើឆាកអន្តរជាតិ៕
