កាលពីថ្ងៃទី ៧ ខែឧសភា ឆ្នាំ ២០២៥ កន្លងទៅនេះ នៅឯប្រទេសថៃមានការចុះចាប់ចោរប្លន់ម្នាក់នៅក្នុងប៉ុស្ដិ៍ប៉ូលិសផ្ទាល់តែម្តង ដែលការពិតចោរជើងល្អគឺជាប៉ូលិសស្រាប់ ចុងក្រោយទាល់ច្រកចោរទាញកាំបិតអារកខ្លួនឯង។
តាមព័ត៌មានបានឱ្យដឹងថា ហេតុការណ៍បានកើតឡើងនៅស្រុក Na Yong ខេត្ត Trang ដោយកាលពីថ្ងៃទី ៣ ខែឧសភា ឆ្នាំ ២០២៥ កន្លងទៅ មានស្រ្តីម្នាក់ដែលជាអ្នកលក់សាច់ក្រក ត្រូវបានចោរមិនស្គាល់មុខជិះម៉ូតូធំមកប្រើកាំភ្លើងគំរាមប្លន់យកខ្សែកមាសអស់មួយខ្សែ រួចក៏ជិះម៉ូតូគេចខ្លួនបាត់ទៅ។ ស្រ្តីខាងលើបានដាក់ពាក្យបណ្តឹង ព្រមទាំងប្រាប់ភិនភាគទៅដល់ប៉ូលិសក្នុងតំបន់ ដែលប៉ូលិសក៏បានធ្វើការស៊ើបអង្កេតទៅ ទើបដឹងថាចោរតាមពិត គឺជាប៉ូលិសមួយរូប វ័យ ៤៦ ឆ្នាំ ដែលប្រចាំការនៅស្រុក Hat Samran ខេត្ត Phetchaburi ។
ខាងប៉ូលិសបានប្រមូលភស្តុតាង និង យកដីកាទៅឃាត់ខ្លួនបុរសជាចោរដល់ប៉ុស្តិ៍ បុរសជាចោរបានភ័យស្លន់ស្លោរ ហើយបានព្យាយាមរត់គេច តែដោយសារតែទាល់ច្រក ក៏បានទាញកាំបិតមកអារ-កខ្លួនឯងបំណងបញ្ចប់ជីវិត។ ខាងប៉ូលិស និង អាជ្ញាធរបានធ្វើការសង្រ្គោះបឋម ហើយក៏បានបញ្ចូនទៅកាន់មន្ទីរពេទ្យបន្តទៀត ដោយអាការបុរសរូបនេះ កំពុងស្ថិតក្នុងសភាពធ្ងន់ធ្ងរ៕
ប្រភព៖ Khaosod
