ប៉ូលិសតៃវ៉ាន់ ចាប់ខ្លួនស្រ្តីជនជាតិថៃ ៩ នាក់ ពីបទលួចលាក់រកស៊ីលក់កេរ្តិ៍ម៉ែខុសច្បាប់ ត្រៀមនិរទេសទៅស្រុកវិញ

កាលពីថ្ងៃទី ៤ ខែសីហា ឆ្នាំ ២០២៥ កន្លងទៅ ប៉ូលិសនៅតៃវ៉ាន់ ធ្វើការឃាត់ខ្លួនស្រ្តីជនជាតិថៃចំនួន​ ៩ នាក់ ក្នុងករណីលួចលាក់រកស៊ីផ្លូវភេទខុសច្បាប់ក្នុងទឹកដីរបស់ខ្លួន។

តាមព័ត៌មានបានឱ្យដឹងថា ប៉ូលិសបានឆ្មក់ចូលផ្ទះបនមួយកន្លែងនៅទីក្រុងតៅយាន នៅតៃវ៉ាន់ ហើយឃាត់ខ្លួនបានបុរសជនជាតិតៃវ៉ាន់ចំនួន ៣ នាក់ និង​ ស្រ្តីជនជាតិថៃចំនួន ៩ នាក់ ដែលក្នុងនោះមាន ១ នាក់ជាភេទទី ៣។ ក្រុមនេះបានធ្វើការជួយដូរផ្លូវភេទ ដោយការឃោសនាតាមរយៈកម្មវិធី Line ហើយប្រើប្រាស់ទីតាំងនៅកន្លែងស្ងាត់ៗ ដើម្បីបម្រើសេវាកម្ម ព្រមទាំងដាក់កាមេរ៉ាសុវត្ថិមើល ដើម្បីគេចពីប៉ូលិស។

តាមព័ត៌មានបានឱ្យដឹងទៀតថា ការបម្រើសេវាកម្មម្តង គឺប្រមាណជា ២០០០ បាត ឬ ជាង ៥០ ដុល្លារ ហើយក្នុងនោះប៉ូលិសបានរឹបអូសលុយបានប្រមាណជា ២២ ០០០ បាត ឬប្រហែលជាង ៦០០ ដុល្លារ។ យ៉ាងណាមិញ បុរសជនជាតតៃវ៉ាន់ទាំង ៣ នាក់ ត្រូវបានកាត់ទោសពីបទរៀបចំអំពើពេស្យាកម្ម រី​ឯស្រ្តីជនជាតិថៃទាំង ៩ នាក់ ត្រូវបានកាត់ទោសតាមច្បាប់សណ្តាប់ធ្នាប់សាធារណៈ និងរង់ចាំការនិរទេសទៅប្រទេសថៃវិញ៕

ប្រភព៖ Sanook