ថ្មីៗនេះ ប៉ូលិសនៅប្រទេសជប៉ុន បានឃាត់ខ្លួនក្រុមជនជាតិថៃចំនួន ៤ នាក់ ទាក់ទងនឹងករណីធ្វើបាប និង ប្លន់ចាស់ជរាតាំងពីចុងឆ្នាំ ២០២៤ កន្លងទៅ។
តាមព័ត៌មានបានឱ្យដឹងថា ជនសង្ស័យទាំង ៤ បានធ្វើសកម្មភាពតាំងយប់ពីថ្ងៃទី ៧ ខែធ្នូ ឆ្នាំ ២០២៤ មកម្ល៉េះ ដោយបានលួចគាស់ចូលទៅក្នុងផ្ទះបុរសចំណាស់វ័យ ៦០ ឆ្នាំម្នាក់ នៅក្នុងសង្កាត់ Hachioji Ward ទីក្រុងតូក្យូ តែបុរសចំណាស់នេះមកទាន់ ទើបក្រុមចោរបានយកពិលទៅវាយធ្វើបាប បណ្តាលឱ្យរងរបួស រួចក៏បានយកនាឡិកា រួមទាំងរបស់របរជាច្រើនទៀតនៅក្នុងផ្ទះតម្លៃសរុបប្រហែល ៩០ ០០០ យ៉េន ឬ ប្រហែលជាជាង ៦០០ ដុល្លារ។
តាមការស៊ើបអង្កេត ប៉ូលិសបានរកឃើញថាជនសង្ស័យម្នាក់ ក្នុងចំណោមនេះ មានអាយុ ៣៩ឆ្នាំ ជាអ្នកអត់ការងារធ្វើ រស់នៅ Kashima ខេត្ត Ibaraki ហើយអ្នកផ្សេងទៀតបានចូលក្នុងប្រទេសជប៉ុនតាមទិដ្ឋាការរយៈពេលខ្លី តែបន្តស្នាក់នៅទាំងផុតកំណត់។ ប៉ូលិសក៏កំពុងតែធ្វើការស្រាវជ្រាវថា ក្រុមចោរនេះអាចពាក់ព័ន្ធក្នុងករណីចោរកម្មផ្សេងៗដែលនៅតំបន់ Kanto ជាពិសេសនៅក្នុងខេត្ត Ibaraki ដែរឬទេ៕
ប្រភព៖ Kapook
