ប៉ិនប្រសប់មែន! សិល្បៈសហសម័យច្នៃពីសារុង ធ្វើឡើងដោយសិល្បករខ្មែរ កំពុងទទួលបានការចាប់អារម្មណ៍ខ្លាំងទាំងក្នុង និង ក្រៅប្រទេស

រាល់សិល្បៈបង្កើតថ្មី ក្រោមស្នាដៃសិល្បករ ថាង សុធា រមែងធ្វើឱ្យមហាជនជាតិ និង អន្តរជាតិចាប់អារម្មណ៍ជាខ្លាំង។ ជាក់ស្តែង ដូចជាស្នាដៃថ្មីច្នៃឡើងពីក្រណាត់សារុង ដែលបានតាំងបង្ហាញក្រោមចំណងជើង «The Keepers» ពីមួយទៅមួយ ពិតជាបង្ហាញពីភាពលម្អិត ភាពច្នៃប្រឌិត និង គំនិតសិល្បៈបង្កប់ទៅដោយអត្ថន័យ។

បើតាមការលម្អិតពីសាលាសិល្បៈ THE GALLERIST លោក ថាង សុធា គឺជាវិចិត្រករសហសម័យដ៏ល្បីមួយរូបខាងផ្នែកច្នៃប្រឌិតថ្មី។ គំនិតរបស់លោកចំពោះសិល្បៈ មានការរួមបញ្ចូលនូវសិប្បកម្មប្រពៃណីជាមួយស្មារតី និង និរន្ធរភាពនៅក្នុងបរិបទនៃជីវិតសម័យទំនើប។

​​​​​​​

បច្ចេកទេសមួយក្នុងចំណោមបច្ចេកទេសផ្ទាល់ខ្លួនរបស់លោក មានការរួមបញ្ចូលទាំងការកែច្នៃក្រណាត់សារុង ដែលជាសម្លៀកបំពាក់ប្រពៃណីខ្មែរ ទៅជាទម្រង់សិល្បៈថ្មី។ សកម្មភាពនៃការកែច្នៃនេះ មិនត្រឹមតែជាការប្រើប្រាស់សម្ភារៈឡើងវិញប៉ុណ្ណោះទេ តែវាជាវិធីមួយដើម្បីផ្តល់ភាពរស់រវើកដល់ក្រណាត់ ដែលមានសារសំខាន់ផ្នែកវប្បធម៌ ដែលធ្វើឱ្យការងារសិល្បៈមានចីរភាព និង និរន្តរភាព។

លោកជាគំរូនៃសិល្បករបង្កើតថ្មី និង ជាវិចិត្រករពហុជំនាញមួយរូបដែលធ្វើឱ្យ ស្ថាបត្យកម្ម និង សិល្បៈផ្សារភ្ជាប់ដ៏ល្អវិចិត្រ និង គ្មានព្រំដែន។ ស្នាដៃរបស់លោក បានដាក់តាំងបង្ហាញទាំងថ្នាក់ជាតិ និង អន្តរជាតិ  ដែលធ្វើឱ្យរូបលោកត្រូវបានទទួលស្គាល់ថា ជាបុគ្គលដ៏មានឥទ្ធិពលម្នាក់ក្នុងសិល្បៈសហសម័យ៕